"Манчестер Сити"нинг асосий ҳужумчиси, Норвегия терма жамоаси юлдузи Эрлинг Холанд янги мавсумни ҳам голлар билан бошлади. Бироқ бу галги статистика ўтган йилларга нисбатан анча "ёмон" кўриниши мумкин.
АПЛнинг жорий мавсумидаги дастлабки тўртта турда Холанд рақиб дарвозаларини беш марта ишғол қилди. Қўполроқ қилиб айтганда, бундай кўрсаткич кўпчилик учун орзу бўлиши мумкин, аммо Холанд каби сермаҳсул ҳужумчи учун бу энг ёмон старт ҳисобланмоқда.
2022/2023-йилги дебют мавсумида у тўртта турда олтита гол урган бўлса, кейинги йили — 2023/2024 мавсумида яна олтита тўп билан ёрқин бошлаганди. Ўтган, 2024/2025-йилги мавсум эса умуман рекорд кўрсаткич билан бошланган — атиги тўрт ўйинда тўққизта гол.
Шу боис, жорий йилги бешта гол — унинг Англиядаги фаолиятидаги энг паст кўрсаткичлардан бири сифатида қайд этилмоқда.
Шу билан бирга, умумий рақамлар Холанднинг ҳали ҳам дунё футболидаги энг хавфли ҳужумчилардан бири эканини кўрсатмоқда. У мавсумнинг бошидан бери барча мусобақаларда тўққизта ўйинда майдонга тушиб, тўққизта гол ва битта ассист қайд этди.
Футболчи клуб билан 2034 йилнинг ёзигача мўлжалланган шартнома асосида ҳаракат қилмоқда. "Трансфермаркт"нинг баҳолашича, унинг бозор қиймати 180 миллион еврога етган — бу эса Холанднинг ҳали узоқ йиллар давомида трансфер бозорида энг қимматбаҳо футболчилардан бири бўлиб қолишини англатади.
Мухлислар эса севимли юлдузидан яна олдинги мавсумлардаги каби ёрқин статистикани кутишмоқда. Чунки Холанд учун бешта гол — фақатгина бошланиш, унинг асосий жанглари ҳали олдинда.
«Замин»ни Telegram’да ўқинг!
