Англия Премьер-лигаси доирасидаги «Арсенал» – «Манчестер Сити» учрашуви ортидан Пеп Гвардиоланинг тактикаси атрофида катта баҳс-мунозаралар авж олди. «Эмирейтс»даги тўқнашувда манчестерликлар тўпга эгалик қилишда атиги 33 фоиз кўрсаткич қайд этди. Бу эса испаниялик мутахассиснинг миллий чемпионатлардаги бутун фаолияти давомида энг паст натижа сифатида қайд этилди.
Футбол жамоатчилиги ва айрим мутахассислар Пепнинг услубини қаттиқ танқид қилишди ва уни Жозе Моуриньо услуби билан таққослашди. Аммо Гвардиоланинг бу гаплардан жони чиққандек бўлди.
«АПЛда чемпион бўлганимизда ҳам бизга “зерикарли футбол кўрсатадиган жамоа” деган тамға қўйгансизлар. Энди эса ўйин услубимизни кескин ўзгартиргандек тасвирлаяпсизлар. Балки келажакда футболчиларим айтар – менинг бу мавсумда қанчалик ўзгарганимни. Чунки улар ҳар бир машғулотда, ҳар бир йиғилишда иштирок этишади. Улардан сўрашингиз мумкин.
Менинг фикримча, ҳеч нарса ўзгармаган. “Наполи”га қарши бошқача ўйнадикми? Йўқ. Кейинги уч кунда тактикани тубдан ўзгартирдикми? Жин урсин, агар уч кунда барча нарсани алмаштира олган бўлсам, демак мен ҳақиқатан дунёнинг энг зўр мураббийиман», — деди Гвардиола.
Испаниялик устознинг бу изоҳлари унинг танқидларга қанчалик жиддий муносабатда эканини кўрсатиб турибди. Бироқ у ўз жамоасига ишончи комиллигини, “Сити” ҳали олдинда катта мақсадларга эришиши мумкинлигини ҳам таъкидлаб ўтди.
Шу тариқа, Пеп Гвардиоланинг танқидларга жавоблари нафақат “Манчестер Сити” мухлисларини, балки бутун футбол жамоатчилигини қизиқтирди. Баҳсдан кейинги муҳокамалар эса клубнинг келгуси ўйинларида қандай тактик йўл тутиши ҳақида янада кўпроқ қизиқиш уйғотмоқда.
«Замин»ни Telegram’да ўқинг!
