"Манчестер Юнайтед"нинг собиқ афсонавий ҳужумчиси Уэйн Руни "Ливерпуль" сафида тўп сураётган Уго Экитикенинг "Саутгемптон"га қарши кечган баҳсдаги майдондан четлатилиши юзасидан фикр билдирди.
Эслатиб ўтамиз, француз ҳужумчиси учрашувнинг 53-дақиқасида биринчи сариқ карточка билан огоҳлантирилган эди. Аммо 85-дақиқада жамоасига ғалаба келтирган голни у либосини ечиб нишонлади ва шу орқали иккинчи сариқ карточка олди ҳамда майдондан четлатилди.
Ушбу вазиятга муносабат билдирган Руни шундай деди:
"Голдан кейин у ҳиссиётларини назорат қила олмади. Балки бу ҳаракати учун ўзи ҳам афсусланган бўлса керак. Аммо буни оқлаш қийин, бу албатта аҳмоқона қарор эди.
Сўнгги йилларда ҳар қандай гол ВАР орқали текширилади ва шундан сўнг нишонланади. Бироқ шундай табиий ҳиссиётларни яна майдонда кўришнинг ўзи ҳам мухлислар учун қувончли бўлди", – деди Руни.
«Замин»ни Telegram’да ўқинг!
