Испаниянинг машҳур клуби “Реал Мадрид” ўз уй стадиони номини ўзгартирди. Энди у расман “Сантьяго Бернабеу” эмас, балки қисқача “Бернабеу” деб аталади. Бу ҳақда “Sport” нашри маълум қилди.
Клуб раҳбарияти бу қарорни брендни глобал бозорда танитиш ва тижорий жиҳатдан самарали бўлиш мақсадида қабул қилганини билдирди. Уларга кўра, қисқа ва замонавий ном маркетингда кучли таъсир беради.
Бироқ кўплаб мухлислар бу қарорга қарши чиқишмоқда. Улар “Сантьяго” сўзини олиб ташлашни клубнинг тарихига ва собиқ президент Сантьяго Бернабеу меросига ҳурматсизлик деб баҳолашди.
Маълумот учун, стадион 1947 йилда “Нуэво Эстадио Чамартин” номи билан очилган бўлиб, 1955 йилда ўша пайтдаги президент Сантьяго Бернабеу шарафига қайта номланган эди.
2019 йилда бошланган реконструкция учун 1,3 миллиард евро сарфланди. Янги лойиҳа замонавий фасад, ёруғлик тизимлари ва кўп мақсадли майдонларни ўз ичига олади.
Клуб раҳбарияти яқин кунларда Пасео-де-ла-Кастельяна кўчасида янги “Бернабеу” ёзувини ўрнатишни режалаштирган. Бу стадионнинг янги тижорий имижини мустаҳкамлашга қаратилган.
Эслатиб ўтамиз, “Реал Мадрид” 2017 йилда Emirates компаниясининг 250 миллион евролик ном ҳуқуқи таклифини рад этган эди. Аммо ҳозирги иқтисодий шароит клубни тижорий сиёсатини қайта кўриб чиқишга мажбур этмоқда.
“Zamin”ни Telegram'да ўқинг!
