“Барселона” мухлислари учун яхши янгилик. Каталония клубининг бразилиялик ҳужумчиси Рафинья Диас узоқ танаффусдан сўнг яна сафга қайтиш арафасида турибди. Бу ҳақда Mundo Deportivo нашри маълум қилди.
Манба хабарига кўра, 16 октябрь куни ўтказилган МРТ текшируви натижалари ижобий чиққан. Шу боис Рафинья 26 октябрь куни бўладиган “Реал Мадрид”га қарши катта дербида майдонга тушиш имконига эга бўлиши мумкин. Шунингдек, у 21 октябрь куни “Олимпиакос”га қарши баҳсда ҳам кичик минутлар ўйнаши эҳтимолдан холи эмас.
“Барселона“ ҳужумчиси 25 сентябрь куни “Реал Овьедо”га қарши беллашув (3:1) пайтида жароҳат олган эди. Клуб шифокорлари аввал бошда унинг тўлиқ тикланишини уч ҳафтада кутишган, аммо жараён бироз узоққа чўзилди. Ҳозирча Рафинья жамоа билан тўлиқ машғулотларни бошламаган ва “Жирона”га қарши Ла Лига учрашувини ўтказиб юборади.
Шунга қарамасдан, унинг ҳолати кун сайин яхшиланмоқда. Жамоа мураббийлари ва шифокорлар шундай тез суръатда тикланишни ижобий баҳолашмоқда. Агар барчаси режа бўйича кечса, Рафинья Эль Класико олдидан жамоага қўшилиши кутилмоқда.
Каталония клуби мухлислари энди Рафиньянинг тезроқ сафга қайтиб, “Реал”га қарши дербида яна ўзининг таъсирли ўйинини намойиш этишини интиқлик билан кутмоқда.
“Zamin”ни Telegram'да ўқинг!
