“Реал Мадрид” бош мураббийи Хаби Алонсо “Барселона”га қарши Эл Класикодаги драматик ғалабадан кейин Винисиус Жуниорнинг алмаштирилиш вақтидаги ҳиссий ҳолати ҳақида фикр билдирди, деб ёзди Marca. Эслатиб ўтамиз, мадридликлар 2:1 ҳисобида зафар қозонган ўйинда бразилиялик вингер алмаштирилганда ғазабланиб, мураббийга қўл бермай майдонни тарк этган, бироз вақтдан сўнг эса трибунаостига қайтиб чиққан эди.
Хаби Алонсо бу вазиятга муносабат билдирар экан, воқеани катта шов-шувга айлантиришни истамаслигини таъкидлади:
“Мен бу лаҳза ҳақида узоқ гапиришни хоҳламайман. Бу жамоа ичида муҳокама қилиниши лозим бўлган нарса. Винисиус жамоа учун жуда муҳим футболчи ва у бугунги натижага катта ҳисса қўшди. Ғалаба тўлиқ ҳақли тарзда қўлга киритилди”, — деди мураббий.
Алонсога кўра, футболчидаги ҳиссий реакция унинг ғалабага бўлган интилишидан келиб чиққан:
“У ҳар доим ғалабани хоҳлайди, шундай характери бор. Буни биз яхши биламиз. Унинг жамоавий руҳи юқори, шунинг учун бу ҳолатни нормал деб ҳисоблайман. Албатта, вазиятни ўз орамизда муҳокама қиламиз — бу жамоа ичида ҳал этилади”, — деб таъкидлади у.
Мураббий шунингдек, жамоанинг умумий ўйинидан мамнунлигини билдирди. Унинг сўзларига кўра, “Реал” нафақат натижа, балки тактик жиҳатдан ҳам “Барселона”дан устун бўлган:
“Бизда яна кўп имкониятлар бор эди, ҳатто пенальти ҳақида баҳс бўлиши мумкин бўлган вазиятлар ҳам бўлди. Аммо муҳими — жамоа яна ўзини рақобатбардош, кучли ва бирлашган ҳолда ҳис этди. Шундай руҳ билан давом этсак, олдимизда катта натижалар кутмоқда”, — деди Алонсо.
Винисиуснинг ҳаракатлари ҳақида турли фикрлар билдирилганига қарамай, “Реал” мухлислари унинг майдондаги фидойилигини юқори баҳолашди. Улар бразилиялик футболчининг жамоага бўлган садоқати ва ғалабага интилишини тушуниш билан қарши олдилар.
Хаби Алонсо эса бу каби эҳтиросли вазиятлар футболда табиий эканини айтди:
“Ҳиссиётлар жуда юқори бўлган ўйинда баъзан бундай ҳолатлар бўлиши мумкин. Асосийси — кейин буни тўғри муҳокама қилиш ва жамоавий руҳни сақлаб қолиш. Винисиус бизнинг оиламиз аъзоси ва унинг ҳиссиётлари ҳам жамоанинг ғалаба хоҳиши билан боғлиқ”, — деди мураббий.
Маълумот учун, “Реал Мадрид” бу ғалабадан кейин Ла Лиганинг 10-туридан сўнг 27 очко билан пешқадамликни сақлаб қолди. “Барселона” эса 22 очко билан иккинчи ўринда қолмоқда.
Шу тариқа, Хаби Алонсо Винисиус билан боғлиқ вазиятни ички масала сифатида баҳолади ва жамоа муҳитини бузмасдан, ўйиндаги руҳий бирдамликни сақлаш муҳимлигини урғулади.
“Zamin”ни Telegram'да ўқинг!
