“Манчестер Сити”нинг хорватиялик марказий ҳимоячиси Йошко Гвардиол жамоага яқинда келиб қўшилган италиялик дарвозабон Жанлуижи Доннарумма ҳақида самимий фикрларини билдирди. Унга кўра, янги посбон нафақат тез мослашган, балки жамоанинг муҳим фигураларидан бирига айланган.
“Сити”да ҳар доим юқори даражадаги дарвозабонлар бўлган — Эдерсон, Жо Ҳарт, Клаудио Браво... Энди улар қаторига Доннарумма ҳам қўшилди. Унинг келиши жамоа учун катта ютуқ. У бу ерда ўз ўрнини тез топди, бу эса жамоа муҳити ва мусобақа руҳи учун жуда муҳим.
Мен яхши эслайман, Англия Премьер-лигасига илк келган пайтимда мослашиш учун анча вақт кетган эди. Бу лигада темп баланд, рақобат кучли. Доннарумма эса жуда тез мослашди — бу унинг характери ва ишга муносабатидан далолат беради”, — деди Гвардиол клуб матбуот хизматига.
Ҳимоячи сўзларига кўра, италиялик посбон нафақат дарвоза хатларини мустаҳкамлаган, балки жамоа ўйинини ҳам енгиллаштирган:
“У тўп билан ишлашда ҳам жуда сокин. Дарвозадан чиқишдан қўрқмайди, баланд бўйига қарамай ҳаракатчан. Бу ҳимоячилар учун ишонч туйғусини беради. Унинг иштирокида орқа чизиқ анча барқарор кўриниш олди”.
Йошко Гвардиол шунингдек жамоа ичидаги муҳит ҳақида ҳам тўхталди:
“Биз барчамиз бир-биримиз учун ҳаракат қилаяпмиз, ўзаро ишонч ва мулоқот кучайган. Ҳар бир ўйинда ҳамжиҳатлик ҳисси сезилади. Бу жамоанинг катта кучидир. Биз олдинда яна катта ютуқларга эришишимиз мумкин деб ўйлайман”.
Дарҳақиқат, Доннарумманинг “Сити”га келиши жамоа учун янги имкониятлар эшигини очди. Унинг фаол ҳаракатлари, тўпни узатишдаги аниқлиги ва реакцияси клуб мухлисларининг эътиборини аллақачон қозонган.
Йошко Гвардиол сўзларини шундай якунлади:
“У жамоамизнинг муҳим бўлагига айланди. У нафақат яхши дарвозабон, балки катта шахс. Биз биргаликда янада кўп ғалабаларга эришамиз”.
“Манчестер Сити” жамоаси навбатдаги турда “Ливерпуль”га қарши ўйинда Доннаруммани асосий таркибда майдонга тушириши кутилмоқда.
“Zamin”ни Telegram'да ўқинг!
