Англия Премьер-лигаси тарихида ўчмас из қолдирган мураббийлардан бири — Юрган Клопп яқинда “Ливерпуль”даги фаолияти ҳақида самимий фикрлари билан ўртоқлашди. Германиялик тажрибали мутахассис клубни қандай аҳволда қабул қилгани ва уни қайтадан Европанинг энг кучли жамоалари сафига қайтариш йўлида нималарни бошидан кечиргани ҳақида BBC’га берган суҳбатида гапирди.
“Мен “Ливерпуль”га келганимда, жамоа ва ўйинчилар ҳеч кимга ёқмас эди. Ҳатто футболчиларнинг ўзи ҳам жамоани яхши кўрмасди, ўзларига ишончлари паст эди. Аммо мен бу вазиятни бошқача кўрдим”, — дейди Клопп.
Унинг сўзларига кўра, жамоада салоҳият бор эди, фақат унга ишониш, ишлаш ва бирлик етишмаган:
“Мен учун Фирмино, Бентеке, Ориги ёки Хендерсон танқид остида бўлиши муҳим эмасди. Мен уларда сўнгги дақиқагача курашадиган руҳни кўрдим. Улар юлдуз эмасди, лекин ҳақиқий жамоа қуришга тайёр эдилар”.
Клоппнинг асосий ғояси жамоага ишонч қайтариш бўлган. Унинг таъкидлашича, клуб унга тайёр, “ютуққа ёзилган” жамоа эмас, балки синиб қолган, лекин кучли потенциалга эга футболчилар билан тўлдирилган таркибни тақдим этган. “Менга юлдузлар билан тўлиб-тошган жамоа берилмади, лекин мен ишондим — шу таркиб билан ҳам катта натижаларга эришиш мумкин”, — дея эслади у.
Германиялик мураббийнинг меҳнати ва ишончли ёндашуви “Ливерпуль”ни янги даврга олиб кирди. Унинг қўл остида жамоа интизомли, жонкуяр ва жамоавий руҳга эга таркиб сифатида Европанинг етакчи клублари қаторига қайтди.
Клоппнинг 2015 йилдан 2024 йилгача бўлган даври клуб учун ҳақиқий “тилла давр” бўлди. Унинг раҳбарлигида “қизиллар” 2019 йилда Европа Чемпионлар Лигасида ғолиб чиқди, кейин эсa 2020 йилда Премьер-лигада 30 йилдан сўнг илк бор чемпионликни қўлга киритди.
“Биз клубни қайтадан нафақат майдонда, балки мухлислар қалбида ҳам тирилтирдик. Энди “Ливерпуль” фақат футбол жамоаси эмас — у бутун дунёда ишонч ва муҳаббат рамзига айланди”, — деди Клопп.
Мутахассис сўнгги йиллар фаолиятини орқага қараб фахр билан эслайди. Унинг таъкидлашича, “Ливерпуль”ни бошқариш нафақат мураббийлик, балки инсон сифатида ўсиш мактаби бўлган:
“Мен бу ерда жамоавий руҳнинг ҳақиқий қийматини англадим. Футбол фақат ғалаба эмас, балки муҳаббат ва ишонч ҳақида эканини бу ерда ҳис қилдим”, — деди у суҳбат охирида.
Юрган Клоппнинг “Ливерпуль”даги йўли нафақат жамоа учун, балки бутун футбол олами учун илҳом манбаи бўлиб қолди. Унинг исми энди нафақат муваффақиятлар билан, балки замонавий футболдаги “ишонч ва инсонпарварлик” рамзи билан ҳам боғланади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
