«Манчестер Юнайтед»нинг бош мураббийи Рубен Аморим кечаги ўйиндан кейин жамоаси кўрсатган ўйин сифати ва интилиш борасида очиқ ва талабчан фикрлар билдирди. Унинг айтишича, рақиб жамоа ҳам тўлиқ таркибда, ҳам бир футболчиси кам бўлган ҳолатда ҳам майдонда анча устун кўринган.
Аморим ўйиндан сўнг шундай деди:
— «Рақиб тўлиқ таркибда ҳам, ўн киши ўйнаганда ҳам биздан анча кучлироқ кўринди. Биз эса ўзимиздан талаб қилинадиган даражада ўйнамаётганимизни сездим. Улар ғалабага ҳақиқатдан ҳам муносиб эдилар», — дея таъкидлади мураббий.
Унинг фикрича, рақиб футболчисининг майдондан четлатилиши «МЮ» учун имконият яратиши керак эди. Аммо кутилганидек бўлмаган:
— «Аслида рақиб ўн киши қолса, ҳужум зонасида биз уларга босимни кучайтириб, устунликни қўлга олишимиз керак эди. Лекин бу умуман амалга ошмади», — дейди Аморим.
Мураббий жамоанинг ўйиндаги ҳаракати ёндашувидан қаттиқ норозилик билдириб, бу ҳолатни орқага қадам деб баҳолади:
— «Бу орқага силжишми? Ҳа. Айниқса, аввалги ўйинлардаги ҳаракатларимиз билан солиштирганда. Натижа ҳақида ўйлаб ўтириш шарт эмас — у аллақачон ёмон. Мени кўпроқ ташвишга солаётган нарса — футболчиларнинг майдондаги руҳи, ҳаракатдаги пасайишдир. Бугун барча бутун кучини ташлаши керак эди».
Аморим жамоа эртага машғулотга чиқишини, барча камчиликлар ва тушунмовчиликлар шу ерда батафсил муҳокама қилинишини айтди:
— «Эртага машғулотимиз бор. Ҳаммаси у ерда аниқ муҳокама қилиниб, ҳақиқатдан қочмаймиз», — дея хулоса қилди мураббий.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
