Дунё футболидаги энг машҳур жуфтликлардан бири — Криштиану Роналду ва Жоржина Родригеснинг узоқ кутилган тўй санаси ва манзили ниҳоят аниқлашди. “Jornal da Madeyra” нашри маълумотига кўра, никоҳ тантанаси Роналдунинг болалиги ўтган шаҳри — Фуншалда, католик черковининг йирик марказий ибодатхонасида ўтказилади. Маросим 2026 йилги Жаҳон чемпионати якунланганидан сўнг, ёз фаслида бўлиб ўтади, деб таъкидланмоқда. Зиёфат эса Фуншалдаги ҳашаматли меҳмонхоналардан бирида давом этади.
Маълумки, 40 ёшли португалиялик юлдуз август ойида узоқ йиллар давомида елкадош бўлиб келган севгилиси Жоржина Родригесга никоҳ таклифини расман билдирганини ижтимоий тармоқларда эълон қилган эди.
Роналду ва Жоржина муносабати 2016 йилда бошланган. У пайтда Криштиану “Реал Мадрид” сафида гол уриб юрган, Жоржина эса Мадриддаги Gucci дўконида ишлаётган бўлган. Улар ҳақидаги афишаланган муносабатлар 2017 йилда, илк қизлари Алана Мартина дунёга келганида оммага маълум бўлган.
Криштиану Роналду бугунги кунда беш фарзанднинг отаси ҳисобланади. Унинг тўнғич фарзанди Криштиану Жуниор 2010 йилда туғилган бўлса, Эву ва Матео исмли эгизаклари 2017 йилда дунёга келган. Роналду ва Жоржина умумий қизлари Алана Мартинани 2017 йилда, энг кенжа фарзандлари Белла Эсмеральда эса 2022 йилда туғилган.
Эслатиб ўтамиз, яқинда португал юлдузи ва “Ал-Наср” сардори Криштиану Роналду Жоржина билан бирга Саудия Арабистони валиаҳд шаҳзодаси ва Бош вазири Муҳаммад бин Салмоннинг АҚШга ташрифи муносабати билан Оқ уйда ўтказилган тантанали кечки овқатда иштирок этгани ҳам айтилган эди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
