Собиқ "Манчестер Юнайтед" футболчиси Дэвид Бекҳем Англия чемпионатида "Қизил иблислар"нинг "Кристал Пэлас" устидан қозонилган 2:1 ҳисобидаги ғалабасидан сўнг интервью берди. Ушбу натижа "Манчестер Юнайтед"га уч ўйиндан буён давом этаётган ғалабасиз серияни тўхтатиш имконини берди.
Бекҳем жамоа бош мураббийи Рубен Аморимнинг иш фаолиятини ижобий баҳолади. "Менимча, мураббий вазиятни яхшилаш учун ўзгаришлар киритмоқда.
У баъзи нарсаларни тўғрилади ва энди яхшиланишлар сезилмоқда. Олдинда ҳали узоқ йўл бор.
Айрим ўйинларда биз яхши ўйнамаганмиз. Аммо яхши мураббийимиз бор.
Мен унинг жамоани аста-секин ўзгартириб бораётганини кўрмоқдаман", - деди Англия футболининг афсонаси Sky Sportsга берган интервьюсида. "Манчестер Юнайтед" ҳозир 13 ўйиндан сўнг 21 очко билан еттинчи ўринда бормоқда.
Чемпионат пешқадами эса 30 очкога эга бўлган Лондоннинг "Арсенал" жамоаси ҳисобланади.
Меҳмон гуруҳидаги фойдаланувчилар ушбу мақолага изоҳ қолдира олмайди.
