Англия Премьер-лигасининг навбатдаги турида амалдаги чемпион “Ливерпул” мухлисларини ташвишга солган яна бир натижани қайд этди. “Лидс”га қарши беллашувда Слот шогирдлари икки бор ҳисобда олдинга чиққан бўлса-да, ғалабани сақлаб қолишнинг иложи бўлмади — учрашув сўнгги дақиқаларда 3:3 ҳисобида якунланди.
Ушбу дуранг жамоа атрофидаги ижобий кайфиятни жиддий силкитди. Муҳим ўйинларда очко йўқотиш оммавий танқидларга сабаб бўлар экан, энг оғири — жамоанинг етакчиларидан бири Муҳаммад Салоҳнинг захирада қолдирилгани ортидан Арне Слот билан муносабатлари ёмонлашгани ҳақидаги маълумотларнинг тарқалишидир.
Айнан шундай вазият клуб раҳбариятини кескин қарор қабул қилиш остонасига олиб келди. Маълумотларга кўра, яқин вақт ичида Арне Слот истеъфога чиқарилиши мумкин. Унинг ўрнига эса жамоа тарихида ўчмас из қолдирган афсона — Стивен Жеррарднинг тайинланиши эҳтимоли юқори.
Жеррард январь ойида “Ал-Иттифоқ”ни тарк этганидан буён ишсиз юрибди ва “Ливерпул”га қайтиш варианти унинг ўзи учун ҳам, клуб учун ҳам катта мотивация ҳисобланади.
Шунингдек, яна бир эҳтимолий номзод сифатида яқингача “Аякс”ни бошқарган Жон Хейтинга номзоди ҳам кўриб чиқилмоқда. Бу эса “Ливерпул”да яқин вақт ичида жиддий қайта қуриш ишлари бошланишидан дарак беради.
Жамоа АПЛдаги мавқеини сақлаб қолиши ва чемпионлик учун курашда ортга чекинмаслиги учун қувончли ўзгаришлар зарур бўлиб қолди. Шу боис “Энфилд”даги кунлар янада қизғин ўтишига ўхшайди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
