Хаби Алонсо «Реал»да уч учрашувда ўзини оқлаши керак

Мадриднинг «Реал»ида вазият кескин. «Сантьяго Бернабеу» трибуналаридан ҳуштаклар янграяпти, Родриго мураббийни қучоқлаб тасалли беради, Жуд Беллингем эса омма олдида қўллаб-қувватлашини айтади.

Бироқ клуб раҳбарияти натижалар йўқлигини кечирмайдиган одатдагидек қатъий позицияда: 44 ёшли баск мутахассис Хаби Алонсо учун ҳар бир ўйин сўнггиси бўлиб қолиши мумкин. Чемпионлар лигасида «Манчестер Сити»дан 1:2 ҳисобидаги мағлубият ҳукмга ўхшайди.

Кетма-кет иккинчи уй учрашувида ютқазиш, сўнгги саккиз ўйинда атиги икки ғалаба — рақамлар шафқатсиз. Энг хавотирли томони эса бошқа: «Реал» анчадан бери илк бор ўйин устидан назоратни йўқотгандек кўринмоқда.

Бу тасодифий мағлубият эмас, балки тизим ва бошқарувнинг издан чиқиши таассуротини қолдирди. Қизиқ парадокс: жамоа ичкаридан Алонсони очиқ ҳимоя қилмоқда.

Родриго ўйиндан сўнг атайлаб ён чизиқда мураббийга бориб, уни қучоқлади ва журналистларга шундай деди: «Ташқаридан туриб муаммолар яратишга уринишлар кўп, бизга бирлик керак». Беллингем эса янада қатъий фикр билдирди: «Бизда ажойиб мураббий бор, у билан муносабатларим жуда яхши».

Тибо Куртуа, Асенсио ва ҳатто ёш Раул Асенсио ҳам бир овоздан такрорлайди: жамоа Хаби учун юз фоиз. Аммо бундай қўллаб-қувватлашнинг ўзи етарли эмас.

«Реал»да натижа биринчи ўринда туради. AS нашри хабарига кўра, Алонсога вазиятни тузатиш учун учта учрашув берилган.

Улардан бирортасидаги муваффақиятсизлик ҳам жараённи якунлаши мумкин. Журналист Хосе Диас эса янада кескинроқ хулоса қилади: Алонсонинг истеъфоси энди «бўладими-йўқми» масаласи эмас, «қачон» масаласи.

Клуб ичида испаниялик мутахассис вазиятни буриб юборишига ишонч паст. Бўлаётган воқеаларга Оливер Кан ҳам қаттиқ баҳо берди: «Алонсонинг тизимли футболга асосланган ёндашуви тор ихтисосли футболчиларни талаб қилади.

«Реал» эса эркинлик ва индивидуаллик ҳақида. Футболчилар қатъий схемалар бўйича ўйнашни истамайди».

Собиқ «Бавария» дарвозабони муаммонинг марказини топди. Хаби «Байер»дан аниқ фалсафа билан келган: структура шахслардан устун, интизом импровизациядан юқори.

Леверкузенда бу аъло даражада ишлади, Мадридда эса бошқа реалликка урилди. Бу ерда Винисиус ва Килиан Мбаппе кўпинча вазиятни индивидуал маҳорат билан ҳал қилишга ўрганиб қолган, позицион қайта жойлашиш ва қатъий роль тақсимоти эса ҳамма учун ҳам қулай эмас.

Андрей Аршавин масалани янада очиқроқ айтди: «Алонсо ўз ғоялари билан келди, «Реал»да эса уларни бўлишмайдиган футболчилар бор. Гап Винисиус ва Мбаппе ҳақида.

Хаби мослашувчанроқ бўлиши керак, чунки бундай вазиятда футболчиларни эмас, мураббийни алмаштиришади». «Реал»да юлдузлар омили доимо жуда кучли бўлган.

Алонсо бу тартибни ўзгартиришга уринмоқда, натижада эса «Бернабеу»да ҳуштаклар ва атиги ярим йил ичида истеъфо ҳақидаги гаплар пайдо бўлди. Кадрлар инқирози ҳам вазиятни оғирлаштирди.

Эдер Милитао, Трент Александер-Арнолд, Дани Карвахал, Ферлан Менди, Эдуардо Камавинга ва Давид Алаба узоқ муддатга сафдан чиқди. Ҳал қилувчи сафар учрашуви арафасида таркибнинг деярли ярми жамоага ёрдам бера олмаяпти.

Алонсо эса вазминликни сақламоқда. Мухлисларнинг ҳуштаги ҳақида сўралганда: «Бу нормал ҳолат.

Уйда ютмасанг, шундай бўлади», деди. Келажаги борасида эса қисқа жавоб берди: «Мен кейинги ўйин ҳақида ўйлаяпман.

Муҳими «Реал», жамоа, футболчилар. Гап мен ҳақимда эмас».

Ла Лига президенти Хавьер Тебас ҳам баск мутахассисни омма олдида қўллади: «Хабининг Мадрид ДНКси бор, у бuni она сути билан сингдирган». Ривалдо унга вақт беришга чақирди, Жонатан Вудгейт эҳтимолий истеъфони кутилмаган қарор деб атади.

Аммо бу овозларнинг бари битта оддий ҳақиқат фонида кучсиз: «Реал» сусткашликни кечирмайди. Хаби Алонсо «Байер»да Бундеслигани ларзага солган механизм яратганди.

«Реал»да эса у суперюлдузлар, жароҳатлар, клуб ичидаги сиёсат ва чидаб бўлмас босим орасида мураккаб жумҳуроқни йиғишга уринмоқда. Ҳозирча бу иш юришмаяпти ва хатоларга вақт қолмади.

Олдинда учта ўйин турибди. Якшанба куни Алонсони «Алавес»га қарши учрашувда яшаб қолиш имтиҳони кутади.

“Zamin”ни Telegram'да ўқинг!