FIFA йилнинг энг яхшиларини аниқлаш жараёнини давом эттирмоқда. Жаҳон футбол жамоатчилиги катта қизиқиш билан кутаётган анъанавий тақдирлаш маросими жорий йил 16 декабрь куни бўлиб ўтади. Ушбу тантанали кечада мавсум давомида энг юқори савияда ўйин намойиш этган футболчилар эътироф этилади.
Йил якунларига кўра, мавсумнинг энг яхши футболчиси унвони учун 11 нафар юлдузли ўйинчи даъвогар сифатида рўйхатга киритилди. Улар орасида клублар ўртасидаги жаҳон чемпионати ғолиблари, Европа Чемпионлар лигасида зафар қучган жамоа етакчилари ҳамда Миллатлар лигасида чемпион бўлган футболчилар бор. Қисқаси, рўйхат фақат номига эмас, натижа ва таъсирга бой.
ФИФА томонидан эълон қилинган номзодлар қуйидагилар:
1. Коул Палмер
2. Педри
3. Усмон Дембеле
4. Витинья
5. Ламин Ямал
6. Харри Кейн
7. Нуно Мендеш
8. Ашраф Ҳакими
9. Муҳаммад Салоҳ
10. Килиан Мбаппе
11. Рафинья
Бу футболчиларнинг ҳар бири жорий мавсумда ўз клуби ёки миллий жамоасида ҳал қилувчи рол ўйнади. Кимдир ҳал қилувчи голлари билан, кимдир ассистлари, барқарор ўйини ёки етакчилик фазилатлари билан мухлислар эътиборини тортди. Айниқса, ёш юлдузлар ва тажрибали лидерлар бир рўйхатда жамлангани соврин учун рақобатни янада қизиқарли қилмоқда.
Мутахассислар фикрича, жорий йилги овоз бериш натижалари кутилмаган сюрпризларга ҳам бой бўлиши мумкин. Чунки номзодлар орасида нафақат анъанавий фаворитлар, балки мавсум кашфиётига айланган футболчилар ҳам бор.
Эслатиб ўтамиз, ўтган йил FIFA’нинг энг нуфузли индивидуал соврини “Реал Мадрид” вингери Винисиус Жуниорга насиб қилган эди. Бу гал эса ким ғолиб бўлади — жавобини 16 декабрь куни бутун футбол олами биргаликда билиб олади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
