Манчестер Юнайтед ва Борнмут саккиз голли дуранг ўйнади

Манчестер Юнайтед навбатдаги учрашувда ҳам барқарорлик муаммосини бартараф эта олмади. Бир қатор муваффақиятли ўйинлардан сўнг “қизил иблислар” Олд Траффордда деярли икки ойдан бери ғалаба қозонмай келаётган Борнмутни қабул қилди ва 4:4 ҳисобида дуранг қайд этилди.

13-дақиқада мезбонлар чиройли ҳужум уюштирди: Амад Диалло ҳужумни бошлаб, тўпни Каземирога узатди. Чап қанотдан узатилган тўп Матеус Куняга етиб бормади, бироқ Диалло яқин масофадан бош билан дарвозани ишғол қилди — 1:0.

Ўйин давомида Кунянинг ўнг қанотдан жарима майдони марказига қилган узатмасидан сўнг Брайен Мбеумо ҳаводан зарба берди, аммо тўп дарвоза тўсинидан юқорига кетди. 40-дақиқада Борнмут қарши ҳужумда ҳисобни тенглаштирди: Антуан Семеньо ўнг қанотда тўпни қабул қилиб, 3 га 2 вазиятда узоқ бурчакка аниқ зарба йўллади — 1:1.

Танаффус олдидан бурчакдан узатмада Каземиро ҳимоячи билан курашда бош билан тўпни дарвозанинг яқин қисмига йўналтириб, Манчестер Юнайтедни яна олдинга олиб чиқди — 2:1. Иккинчи бўлим бошланиши билан Эванилсон жарима майдони чизиғида узатма қабул қилди ва аниқ зарбаси билан мувозанатни тиклади — 2:2.

52-дақиқада эса Маркус Тавернье 20 метрдан жарима зарбасини пастдан чап бурчакка кучли йўллаб, Борнмутни олдинга олиб чиқди — 2:3. 77-дақиқада Бруну Фернандеш 22 метрлар атрофидан жарима зарбасини ўнг юқори бурчакка ажойиб йўналтириб, ҳисобни тенглаштирди — 3:3.

Орадан икки дақиқа ўтиб, Манчестер Юнайтеднинг тезкор ҳужумида Беньямин Шешко чап қанотдан жарима майдонига пас узатди, тўп ҳимоячидан рикошет қилиб Куняга келиб тушди ва у 10 метрдан бурчакка аниқ зарба берди — 4:3. Бироқ Борнмут тезда жавоб қайтарди: Алекс Хименес узатмасидан сўнг Эли Жуниор Крупи ўрта масофадан чап томонга аниқ тепиб, якуний ҳисобни ўрнатди — 4:4.

Ушбу дурангдан кейин Манчестер Юнайтед 5-ўринда борган Кристал Пэлас ва Ливерпул билан очколар бўйича тенглашди. Борнмут эса 13-ўринда қолди.

“Zamin”ни Telegram'да ўқинг!