Англия Премьер-лигасида «Борнмут»ни ишонч билан бошқариб келаётган бош мураббий Андони Ираоланинг номи яна бир бор йирик клуб билан боғланмоқда. Сўнгги хабарларга кўра, испаниялик мутахассис яқин келажакда «Манчестер Сити»га йўл олиши эҳтимолдан ҳоли эмас.
TEAMtalk нашри тарқатган маълумотга асослансак, «шаҳарликлар» раҳбарияти Ираолани эҳтимолий номзодлар рўйхатига киритган. Манчестер клуби мутахассиснинг «Борнмут»да олиб бораётган ишларини диққат билан кузатмоқда ва уни келажакда Хосеп Гвардиоланинг ўрнини босиши мумкин бўлган шахс сифатида баҳоламоқда.
Бироқ ҳозирча Гвардиоланинг кетиши кун тартибида эмас. Каталониялик мураббий жамоада барқарор муҳитни сақлаб келяпти ва агар фавқулодда жиддий муаммолар юзага келмаса, у амалдаги шартномасини тўлиқ бажариши кутилмоқда. Маълумот учун, Гвардиоланинг «Манчестер Сити» билан шартномаси 2027 йил 30 июнигача амал қилади.
Шу билан бирга, Ираола «Сити» учун ягона вариант эмас. Клуб раҳбарияти ўз вақтида жамоа шарафини ҳимоя қилган, ҳозир эса мураббий сифатида муваффақият қозонаётган Венсан Компанини ҳам диққат марказида ушлаб турибди. Бельгиялик мутахассис айни дамда Бундеслиганинг йирик клуби «Бавария»ни самарали тарзда бошқаряпти.
Қисқаси, «Манчестер Сити» келажак ҳақида жиддий ўйламоқда. Ҳозирча барчаси тинч, аммо клубнинг Гвардиоладан кейинги даврга тайёргарлик кўраётгани очиқ-ойдин сезилмоқда. Бу жараёнда Андони Ираоланинг номи тобора кўпроқ тилга олинаётгани эса бежиз эмас.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
