Англия Премьер-лигасидаги навбатдаги драматик тўқнашувлардан бири "Челси" учун қийин, аммо қимматли очко билан якунланди. Лондониклар «Сент-Жеймс Парк»да "Нюкасл Юнайтед"га қарши баҳсда 0:2 ҳисобида ортда қолганига қарамай, иродали ўйин намойиш этиб, дуранг — 2:2 натижани қайд этди.
Учрашувдан сўнг «кўклар» бош мураббийи Энцо Мареска ўйин ҳақида фикр билдириб, натижани тўлиқ мантиқий, деб баҳолади. Унинг сўзларига кўра, жамоа меҳмонда икки тўп фарқи билан ютқазаётган пайтда очко қўлга киритгани билан фахрланса арзийди.
Баҳснинг биринчи қисми «Челси» учун анча мураккаб кечди. Учрашувнинг бошланишидаёқ Ник Волтемаде ҳисобни очди, танаффусгача эса мезбонлар устунликни икки голгача оширишга улгурди. Шу пайтда майдонда «Нюкасл» ўз ўйинини тўлиқ назорат қилгандек эди.
Бироқ иккинчи бўлим бутунлай бошқа манзарада ўтди. Аввалига жамоа сардори Рис Жеймс жарима зарбасидан ажойиб гол уриб, камбэк учун умид уйғотди. Орадан кўп ўтмай, дарвозабон Роберт Санчеснинг аниқ узатмаси орқали тезкор қарши ҳужум ташкил этилди ва Жоау Педру уни совуққонлик билан якунлаб, ҳисобни тенглаштирди.
Қолган дақиқаларда ўйин ҳар икки томон учун ҳам очиқ тус олди. «Челси» сафида Алехандро Гарначонинг хавфли зарбасини дарвозабон қайтарди, Мойсес Кайседо йўллаган тўп эса устун ёнидан ўтиб кетди. Шу билан бирга, мезбонларда ҳам ғалаба голини уриш имконияти бўлди.
Маресканинг таъкидлашича, биринчи бўлимда ўтказиб юборилган тезкор гол ўйин тақдирига катта таъсир кўрсатган. Шу билан бирга, у иккинчи бўлимда киритилган ўзгаришлар жамоага ўйинни ўз фойдасига буриш имконини берганини қайд этди.
«Бу стадионда 0:2 ҳисобини йўққа чиқариш ҳар қандай жамоа учун жуда қийин. Биз эса характер кўрсатдик», — дея хулоса қилди мутахассис.
Ушбу дурангдан кейин «Челси» очколари сони 29 тага етди ва жамоа турнир жадвалида 4-ўринни сақлаб қолди. Мавсум якунигача бундай иродали ўйинлар «кўклар» учун ҳал қилувчи аҳамият касб этиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
