Аргентина терма жамоаси ҳужумчиси Лионель Месси футболчилик фаолиятини якунлагандан кейин ўзини қаерда, қандай ролда кўришини очиқ айтди. Унинг гапларидан билинишича, мухлислар кутган “Месси — мураббий” сценарийси ҳозирча унга яқин эмас.
Жаҳон футболининг тирик афсонаси ростдан ҳам мураббийлик ғояси ёқимли кўринишини тан олди. Аммо танлов қилишига тўғри келса, у бошқа йўлни — клуб эгаси бўлишни афзал кўрар экан. Месси учун бу оддий “ном учун лавозим” эмас, балки катта лойиҳа: ўз клубини нолдан қуриш, уни босқичма-босқич ўстириш, тизим яратиш.
“Ростини айтсам, ўзимни мураббий сифатида кўрмаяпман. Мураббий бўлиш ғояси ёқади, лекин агар танлашим керак бўлса, клуб эгаси бўлишни афзал кўраман”, — дея фикр билдирди Месси.
Унинг таъкидлашича, энг кўп илҳом берадиган жиҳат — ёш футболчиларга имконият бериш. Яъни, скаутингдан тортиб академиягача, шароитдан тортиб мотивациягача — кимдир ўсиши, ўз устида ишлаши ва катта мақсадларга етиши учун йўл очиб бериш. Месси учун айнан шу жараён — “менга энг кўп ёқадиган ва жалб қиладиган нарса”.
Қисқаси, Месси майдонни тарк этса ҳам, футболдан узоқ кетмоқчи эмас. Фақат у бунда “тактика тахтаси” ортида эмас, балки катта лойиҳанинг бошида — клуб қуриш, ёшларни тарбиялаш ва янги тарих ёзиш томонида бўлишни кўпроқ хоҳлаяпти. Энди савол битта: бу орзу қайси мамлакатда ва қачон ҳақиқатга айланади?
“Zamin”ни Telegram'да ўқинг!
