Саудия Арабистони мезбонлик қилаётган 23 ёшгача бўлган футболчилар ўртасидаги Осиё кубогида гуруҳ баҳслари қизишдан тўхтамаяпти. “B” гуруҳида иштирок этаётган Ўзбекистон U-23 терма жамоаси биринчи турни ғалаба билан бошлаб, Ливанни драматик ўйинда 3:2 ҳисобида мағлуб этди. Мухлислар учун эса бу — “аввал ишни қилиб, кейин асабни синаб кўриш” деган классик сценарий бўлди.
Учрашувда ҳисоб 24-дақиқада очилди: Амирбек Саидов ўзига хос ишонч билан ҳужумни якунлаб, жамоамизни олдинга олиб чиқди. Биринчи голдан кейин ҳам Ўзбекистон босимни туширмади — аксинча, темпни ошириб, ўйинни ўз қўлида ушлаб турди.
Иккинчи тайм бошланиши билан Равшан Ҳайруллаев рақиб мудофаасини яна бир бор “қулфсиз” эканини кўрсатиб қўйди — 2:0. Орадан кўп ўтмай, 57-дақиқада Сардор Баҳромов чиройли зарба билан ҳисобни 3:0га етказди. Шу пайтга келиб ҳамма “тайёр, бугун осон” деб ўйлагандир, лекин футбол ҳеч қачон фильм сингари сценарийга бўйсунмайди.
Ливан ҳам таслим бўлмади. Улар Шахин Леонардо Фара орқали бир гол билан жавоб қайтариб, интригани қайта тирилтиришди. Энг қизиғи эса охирида бўлди: ҳакам қўшиб берган дақиқаларда ливанликлар яна бир бор дарвозамизни ишғол қилди — 3:2. Яхшиямки, вақт ҳам, жавоб учун имконият ҳам уларга етарли қолмади.
Шундай қилиб, Равшан Ҳайдаров шогирдлари 3 очко билан “B” гуруҳида турнир жадвалида пешқадамга айланди. Гуруҳнинг иккинчи ўйини — Жанубий Корея ва Эрон тўқнашувида эса гол кўрилмади, баҳс 0:0 ҳисобида якунланди. Бу натижа Ўзбекистон учун янада қўл келди: стартда уч очко — бу гуруҳ йўлини анча очиб беради.
Энди асосий вазифа оддий: ғалабани чиройли бошлаган эканмиз, давомини ҳам худди шундай “сувдай” олиб кетиш керак. Лекин охирги дақиқалардаги икки гол шунга ишора қилди — ҳимояда “ўйин тугади” деган фикрга жой йўқ. Мусобақа энди бошланди, демак, олдинда яна катта имтиҳонлар турибди.
U-23 Осиё Кубоги
Гуруҳ босқичи. 1-тур
Ўзбекистон U-23 - Ливан U-23 3:2
Ар-Риёд. "Шаҳзода Файсал Бин Фаҳд" стадиони
Голлар: Амирбек Саидов (Саидумар Саиднуруллаев) 24, (1:0), Равшан Хайруллаев 50 (2:0), Сардор Баҳромов 58 (3:0), Леонардо Шаҳин 65, 90+5 (3:2)
Ўзбекистон: 21. Самандар Муратбаев, 2. Саидҳон Ҳамидов, 4. Ғиёсжон Ризакулов, 6. Равшан Хайруллаев ( 10. Рустамбек Фомин,90+6), 7. Сардорбек Баҳромов ( 3. Дилшод Муртазаев,86), 9. Саидумархон Саиднуруллаев, 11. Асилбек Жумаев, 16. Беҳрузжон Каримов (19. Муҳаммад-Бобур Каримов, 74), 17. Амирбек Саидов (23. Абдуғафур Ҳайдаров,74) 20. Дилшод Абдуллаев, 22. Нурлан Ибраимов (14. Азизбек Тўлқинбеков,86).
Захира: 1. Максим Муркаев, 12. Умар Рустамов, 5. Озодбек Эргашов, 8. Муҳаммедали Реимов, 13. Ислом Анваров, 15. Мейирбек Режабалиев, 18. Шохжаҳон Ёрқинбоев.
Ливан U-23: 23. Антони Масри, 3. Жад Виктор Смаира, 4. Ҳасан Фарҳат, 5. Муҳаммад Сафван, 6. Муҳаммад Гамлуч (14. Хассан Фоуани, 61), 7. Маҳмуд Збиб (18. Даниел Истамбули,74), 8. Али Эл Фадл (17. Шади Жоуни,83), 11. Али Касас, 16. Ходир Хаддур (2. Али Алрида Исмаил, 61), 19. Леонардо Шаҳин, 20. Нур Ауде (10. Муҳаммад Садек,61).
Захира: 1. Шареф Азаки, 9. Ҳассан Базз, 12. Юсуф Эл Ҳажи, 13. Хосеин Реда, 15. Ибраҳим Чами, 21. Моҳаммад Боу Салеҳ, 22. Заҳер Ал Амин.
Огоҳлантириш: Маҳмуд Збиб (Ливан) 39, Али Касас (Ливан) 79, Жад Смаира (Ливан) 85, Муҳаммад-Бобур Каримов (Ўзбекистон) 90+3.
“Zamin”ни Telegram'да ўқинг!
