«Ан Наср» ҳужумчиси Криштиану Роналду ҳақида бу сафар унинг собиқ жамоадоши — Неманя Матич илиқ хотираларини бўлишди. «Манчестер Юнайтед» сафида португалиялик юлдуз билан бирга тўп сурган тажрибали яримҳимоячи Роналдунинг майдондаги таъсири, инсон сифатидаги фазилатлари ва жамоага олиб кирган руҳияти ҳақида гапирди.
Матичнинг таъкидлашича, Роналду каби футболчи билан бир жамоада бўлиш — нафақат ўйин, балки ҳар куни янги нарса ўрганиш демак.
«У билан бир жамоада бўлиш, бирга ўйнаш ва ҳар куни ниманидир ўрганиш мен учун катта бахт эди. Унинг Манчестерга қайтиши ўзгача лаҳза бўлди», — дейди Матич.
У Роналдунинг клубга қайтган даврини алоҳида эҳтирос билан эслаган. Чунки португалиялик майдонга тушган захоти атмосфера ҳам ўзгарар, жамоада босим даражаси сезиларли ошар эди. Матич буни жуда оддий, лекин жуда аниқ мисол билан тушунтирди: айниқса ёш футболчилар кўпинча тўпни Роналдуга узатишга шошилар, ҳатто бу энг тўғри қарор бўлмаган вазиятларда ҳам.
Яъни, Роналду бор жойда ҳамма унинг таъсирини ҳис қилади: рақиб ҳам, жамоадош ҳам. Бундай футболчи майдонда бўлса, ҳамма бир лаҳзада “план Б”ни ҳам унутиб қўяди — чунки “Роналду ҳал қилади” деган ишонч автоматик равишда ишлай бошлайди.
Матич Роналдунинг инсон сифатидаги қиёфасига ҳам тўхталди. Унинг айтишича, Криштиану ҳар доим кайфияти баланд, руҳан тетик, атрофдагиларга позитив тарқатадиган одам бўлган. Негативни ёқтирмас, тушкунликни кўрсатмас, жамоага “оғир энергия” олиб кирмас экан.
«У — ажойиб инсон. Ҳар доим яхши кайфиятда бўларди, ҳеч нарсада негативлик кўрсатишни истамасди ва, эҳтимол, айнан шу фазилатлари туфайли фаолиятида ютуқларга эришган», — дейди Матич.
Шу билан бирга, собиқ яримҳимоячи муҳим бир фикрни ҳам яширмади: Роналду «Юнайтед»га қайтган пайтда унинг “энг юқори чўққиси” аллақачон орқада қолганини уқтирди. Аммо бу гап ҳеч қандай камситиш эмас — аксинча, реал баҳо. Чунки Матич барибир у билан бир майдонда бўлганидан фахрланишини, бу фаолиятидаги эсда қоларли саҳифа эканини таъкидлади.
Неманя Матич ҳозирда «Сассуоло»да тўп сураётган бўлса-да, «Олд Траффорд»даги хотиралар — айниқса Роналду билан боғлиқ лаҳзалар — ҳали ҳам унинг қалбида алоҳида ўрин эгаллайди.
Хулоса бир гап: Роналду майдонга тушса, фақат ўйин эмас — бутун муҳит ўзгаради. Босим ҳам ошади, ишонч ҳам. Ва Матич айтганидек, буни ўз кўзи билан кўрганлар яхши билади.
“Zamin”ни Telegram'да ўқинг!
