“Манчестер Юнайтед”нинг собиқ футболчиси Андрей Канчелскис жамоанинг аввалги бош мураббийи Рубен Аморим ишдан бўшатилганидан кейин кайфияти кўтаринки кўрингани ҳақида фикр билдирди. Бу ҳақда euro-football.ru хабар беради.
Клуб португалиялик мутахассис билан ҳамкорлик якунланганини 5 январ куни маълум қилди. Орадан кўп ўтмай Британия ОАВда Аморимнинг юзида табассум билан тушган суратлари тарқалди.
Канчелскис бу ҳолатни кескин баҳолаб, “Бундай пул бўлса, исталган одам кулади. У ҳатто бундай қилиш мумкин эмаслигини ҳам тушунмаяпти”, дея “SE”га берган интервьюсида айтди.
Шунингдек, у “Манчестер Юнайтед” каби улкан клубда истеъфо ҳар қандай мураббий учун оғир зарба бўлиши кераклигини таъкидлади. Канчелскис собиқ иттифоқ даврини ҳам эслаб, ўша пайтларда футболчи ва мураббийлар мағлубиятлардан кейин кўзга кўринмасликка ҳаракат қилишганини қўшимча қилди.
Эслатиб ўтамиз, Рубен Аморим “Манчестер Юнайтед”ни 2024 йил кузидан буён бошқариб келган. Ўтган мавсум унинг қўл остида “қизил иблислар” Англия Премьер-лигаси турнир жадвалида 15-ўринни эгаллади.
“Zamin”ни Telegram'да ўқинг!
