“Барселона” вингери Маркус Решфорд Испания Суперкубоги финалида “Реал” устидан 3:2 ҳисобидаги ғалабадан кейин журналистлар билан суҳбатлашди. Бу ҳақда euro-football.ru хабар беради.
Англиялик футболчи 83-дақиқада захирадан майдонга тушиб, ўйинда дубл қайд этган ва учрашув қаҳрамонига айланган Рафиньяни алмаштирди.
“Жуда хурсандман. Бу — “Барселона” сафидаги биринчи совриним, илк ғалаба эса ҳар доим энг ёқимлиси бўлади. Умид қиламанки, бу мавсум яна бир нечта кубокларни қўлга киритамиз”, — деди 28 ёшли футболчи.
Решфорд жамоа ўз имкониятини тўлиқ кўрсатганини таъкидлаб, навбатдаги учрашувда ҳам ғалаба учун бор кучини беришини айтди. “Ҳозир эса шу лаҳзадан роҳатланиш керак”, — дея унинг сўзларини келтиради “Gazeta.Ru”.
Маълумот учун, Маркус Решфорд “Манчестер Юнайтед”дан жорий мавсум охиригача “Барселона”га ижарага олинган.
“Zamin”ни Telegram'да ўқинг!
