«Реал» футболчилари Алонсо кетганини янгиликлардан билишди...

Мадриднинг «Реал» клуби футболчилари учун Хаби Алонсонинг истеъфоси кутилмаган воқеа бўлди. Испаниялик мутахассиснинг жамоани тарк этгани ҳақидаги хабар “қаймоқранглилар”нинг ўзлари учун ҳам ҳақиқий сюрпризга айланди. Аввалроқ клуб раҳбарияти ва бош мураббий ўзаро келишув асосида ҳамкорликни тўхтатгани расман эълон қилинган эди.

Бу қарор Испания Суперкубоги финалида «Барселона»га қарши драматик баҳсда (2:3) мағлубиятдан сўнг қабул қилинди. Бироқ жамоа ичидаги муҳит бу каби кескин ўзгаришдан дарак бермаган. Marca нашри маълум қилишича, айрим футболчилар Алонсонинг кетганини фақат клубнинг расмий баёноти орқали билишган.

Кийиниш хонасида ҳам, финалдан кейин жамоа уйга қайтаётган самолётда ҳам вазият тинч ва хотиржам бўлган. Ўйинчилар мавсум ўртасида бундай қарор қабул қилиниши мумкинлигини хаёлига ҳам келтиришмаган. Айниқса, «Барселона»га минимал фарқ билан ютқазилгани жамоада жиддий хавотир уйғотмаган эди.

Суперкубокдан кейин футболчилар лойиҳа давом этишига ишонган. Қолаверса, тақдирлаш маросимида клуб президенти Флорентино Переснинг Хаби Алонсо билан қучоқлашиб кўришгани мураббийга тўлиқ ишонч бор, деган фикрни янада кучайтирган.

Шу сабабли, Алонсонинг кетиши жамоа учун ҳақиқий шок бўлди. Айрим ўйинчилар шахсий суҳбатларда бу хабарни олдиндан ҳеч қандай огоҳлантиришсиз, тўсатдан билишганини тан олган. Қизиғи шундаки, уларнинг айтишича, охирги ҳафталарда мураббий ва жамоа ўртасидаги муносабатлар аксинча яхшиланиб бораётган эди.

Қисқаси, «Реал» кийиниш хонасида бу қарор ҳали узоқ муҳокама қилиниши аниқ. Футболда эса, афсуски, баъзан янгиликлар энг тез зарба беради.