Саудия Арабистонида катта трансфер орзулари яна бир бор баланд овозда айтилди. Маҳаллий клублардан бирининг президенти Анмар Ал Ҳайли очиқ баёнотида Лионель Мессини ўз жамоасида кўришни жуда исташини билдириб, бу мақсад йўлида мисли кўрилмаган шартларга ҳам рози эканини таъкидлади.
Гарчи аргентиналик суперюлдуз ўтган кузда “Интер Майами” билан шартномасини 2028 йил охиригача узайтирган бўлса-да, Саудия томони бу мавзуни яширмаяпти: агар 38 ёшли ҳужумчи бир куни клубини алмаштириш ҳақида ўйлаб қолса, у ерда уни “тайёр саҳна” ва очиқ қучоқ билан кутиб олишади.
Ал Ҳайлининг сўзларига кўра, “Ал Иттиҳод” учун замонавий футболнинг энг етук ва энг катта номи билан музокараларда молиявий чеклов деган тушунча йўқ. Клуб раҳбари Мессига исталган муддатга, ҳатто умрбод шартнома таклиф қилишга ҳам тайёр эканини айтган. Шунингдек, маош масаласида ҳам футболчига тўлиқ эркинлик бериш мумкинлигини урғулаган.
“Мени рақамлар қизиқтирмайди. Мен фақат битта нарсани хоҳлайман — Месси “Ал Иттиҳод” либосини кийишини. У — тарихдаги энг улуғ футболчи”, — деган Ал Ҳайли.
Лионель Месси 2023 йил ёзидан бери “Интер Майами” шарафини ҳимоя қилиб келяпти ва ҳалигача MLSнинг энг катта рамзи, энг кўп муҳокама қилинадиган юлдузи бўлиб турибди. Лекин Саудия Арабистонидаги кайфиятдан битта хулоса чиқади: агар афсона бир кун қитъани ўзгартиришга қарор қилса, у ерда “кейинги қадам”га аллақачон ҳаммаси тайёр.
Қисқаси, ҳозирча бу — орзу ва даъво. Аммо Саудия футболининг трансфер сиёсатига қарасангиз, улар орзуни одатда “реал лойиҳа”га айлантириб қўя олади. Энди ҳаммасини вақт кўрсатади: Месси Америкада тарих ёзишда давом этадими ёки бир кун келиб, янги саҳифани Яқин Шарқда очадими.
“Zamin”ни Telegram'да ўқинг!
