«Барселона»нинг марказий ҳимоячиси Роналд Араухо сўнгги даврда бошидан кечирган руҳий босим ва ички ҳолати ҳақида гапирди. Бу ҳақда euro-football.ru хабар беради.
Уругвайлик футболчи ноябрь охирида ментал тикланиш учун клуб базасини вақтинча тарк этишга мажбур бўлган. Унинг айтишича, Европа Чемпионлар лигасида «Челси»га қарши ўйин энг оғир нуқтага айланган: у биринчи бўлимнинг ўзидаёқ қизил карточка олган, жамоа эса 0:3 ҳисобида ютқазган. Январ ойида 26 ёшли ҳимоячи яна сафга қайтган.
«Бир ярим йил давомида хавотир билан курашдим, кейин бу ҳолат депрессияга айланиб кетди. Мен айнан шундай аҳволда футбол ўйнаганман», — дейди Араухо. Унинг сўзларини Mundo Deportivo келтирди.
Футболчининг таъкидлашича, «Челси» билан учрашувдан кейин у кўп нарсани қайта кўриб чиққан. «Ҳозир ўзимни анча бахтли ҳис қилаяпман, ниҳоят севимли иш — футбол ўйнашдан завқ ола бошладим. Тикланишга кетган вақт бекорга кетмади, мен бошқа одам бўлдим», — деди у.
Февраль бошида «Барселона» сардори Испания Кубогида «Албасете»га қарши баҳсда (2:1) гол уриб, жамоасига ёрдам берди.
“Zamin”ни Telegram'да ўқинг!
