АҚШнинг Интер Маями CФ клуби расмий сайти орқали чемпионлик тури доирасида Пуэрто-Рикода ўтказилиши режалаштирилган ўртоқлик учрашуви 26 феврал санасига кўчирилганини маълум қилди.
Қайд этилишича, қарор жамоа сардори — Лионел Мессининг жароҳати сабаб қабул қилинган.
38 ёшли юлдуз мазкур ҳолат юзасидан Пуэрто-Рикодаги мухлислардан узр сўради.
— Афсуски, сўнгги ўйинда мушакларимда ноқулайликни ҳис қилдим. Сизлар билан учрашувни жуда кутган эдик, шу боис клуб билан биргаликда менинг Пуэрто-Рикога бориб майдонга тушишим учун муқобил сана белгилаш устида ишладик.
Сизлар қанчалик ҳаяжон билан ўйинни кутаётганингизни ва “Интер Маями”ни жонли томоша қилишни исташингизни яхши биламиз. Бу яқин орада амалга ошишига умид қиламан, — деди Месси.
Футболчининг ушбу мурожаати ижтимоий тармоқларда қисқа вақт ичида кенг тарқалди. Кўплаб мухлислар Мессининг ўз мухлисларига бўлган ҳурмати ва самимий муносабатини юқори баҳоламоқда.
“Zamin”ни Telegram'да ўқинг!
