Бугунги кунда хориж чемпионатларида тўп тепаётган ўзбекистонлик футболчилар сафимиз тобора кенгайиб бормоқда. Деярли ҳар ҳафта легионерларимиз голи, ассисти ёки шунчаки майдондаги “мужикона” ўйини билан мухлисларни қувонтираяпти. Хўш, якунланган ҳафта улар учун қандай ўтди? Бу сафар эътиборни “Истанбул Башакшехир” сафида ҳаракат қилаётган Элдор Шомуродов ҳамда Аббосбек Файзуллаев фаолиятига қаратамиз.
Клуб жорий мавсум олдидан таркибни сезиларли кучайтирди: бир қатор юқори савиядаги ижрочилар олиб келинди ва мақсад ҳам катта — чемпионатда юқори поғоналар учун жиддий кураш. Ёзда жамоага қўшилган икки нафар ўзбекистонлик футболчи эса қисқа фурсатда “мослашиб олган легионер” эмас, балки жамоанинг муҳим фигураларига айланиб улгурди.
Бу фикрни бош мураббий Нури Шахиннинг сўзлари ҳам тасдиқлайди. Мутахассис Элдор Шомуродовнинг жамоа учун аҳамиятини алоҳида таъкидлаб, уни лигадги энг “ақлли” ҳужумчилардан бири, дея баҳолади. Нури Шахинга кўра, Элдор ҳозир кўпроқ қанотларда ҳаракат қилиб, вазиятни тўғри ўқийди, қарорларни ҳам жуда пухта қабул қиляпти. Шунинг учун “Башакшеҳир” ундан максимал самара чиқаришга ҳаракат қилмоқда: майдонда эркинлик ҳам, лидерлик ҳам бериляпти.
Бироқ ҳафтанинг натижаси жамоа учун кўнгилдагидек бўлмади. “Башакшеҳир” ўз уйида турнир жадвалида ёнма-ён келаётган “Бешиктош”ни қабул қилди ва 2:3 ҳисобида жуда аламли мағлубиятга учради. Ушбу дербига яқин баҳсда Элдор Шомуродов ҳам, Аббосбек Файзуллаев ҳам асосий таркибда майдонга тушди.
Энг қизиғи, ҳар икки футболчи ҳам гол уришга жуда яқин келди. Бироқ омад бир қадам наридан қочди: зарбалар ё дарвоза тўсинига тегди ёки дарвозабон томонидан қайтарилди. Яъни, ўйин бўлди, ҳаракат бўлди, имконият бўлди — фақат таблодаги “гол” деган сўз етишмади.
Маълумки, Элдор Шомуродов тўпурарлар пойгасида етакчилик учун кураш олиб бормоқда. “Бешиктош”га қарши баҳсда ҳисобни оча олмагач, у пешқадамликни Пол Онуачууга бой берди. Айни пайтда Онуачуу 16 та гол билан олдинда, Элдор эса 15 та гол билан иккинчи ўринда бормоқда. Бу фарқ кичикдек, лекин тўпурарлар пойгасида битта эпизод ҳам катта аҳамиятга эга.
Ҳозирда “Башакшеҳир” 33 очко жамғариб, Туркия Суперлигаси турнир жадвалида 5-ўринни эгаллаб турибди. Демак, жамоа юқори поғоналар учун курашдан узилгани йўқ, аммо бундай учрашувларда йўқотилган очколар кейин “қайтиб келмас” бўлиши мумкин.
Хулоса қилиб айтганда, Шомуродов ва Файзуллаев майдонда ўзини кўрсатяпти, жамоадаги ўрни мустаҳкам, мураббий ҳам ишоняпти. Ҳа, бу ҳафта омадсиз тугади. Лекин мавсум узун, бундай кечалар эса одатда кейинги ўйинларда “жазо”га айланади: футболчилар янада ғазабли, янада чанқоқ ва янада хавфли бўлиб чиқишади. Мухлислар эса шунга умид қилади — навбатдаги турда тўсин эмас, табло “ишласин”.
