"Ман Сити" ярим ҳимоячиси Бернардо Силва клуб тарихидаги энг муваффақиятли футболчи мақомига эришди. Португалиялик футболчи Англия Премьер-лигаси доирасида "Бернли"га қарши кечган баҳсда (1:0) ўзининг 215-ғалабасини қўлга киритди. Шу тариқа у клуб афсонаси Давид Силванинг 214 та ғалабадан иборат рекордини янгилашга муваффақ бўлди. Бу ҳақда Goal.com хабар беради.
Бернардо Силва 2017 йилда "Монако"дан трансфер қилинганидан буён жамоанинг ажралмас бўлагига айланди. Ҳозирда у ғалабалар сони бўйича рўйхатда якка пешқадамлик қилмоқда. Кучли учликдан Давид Силва ва 205 та ғалаба билан дарвозабон Эдерсон жой олган. 31 ёшли ярим ҳимоячи Премьер-лигадаги 299 та ўйинининг 72 фоизида ғалаба қозонган.
"Бернли" билан ўйин Силва учун яна бир кўрсаткич бўйича тарихий аҳамиятга эга бўлди. У клуб сафидаги 453-учрашувини ўтказиб, барча мусобақалардаги иштироки бўйича Майк Саммербидан ўзиб кетди ва 8-ўринга кўтарилди. Гвардиола қўл остида у қанот ҳужумчисидан марказий ярим ҳимоячигача бўлган турли позицияларда ўзини кўрсатиб келмоқда.
Бернардо Силва саккиз мавсум давомида "Ман Сити" билан 19 та нуфузли совринни қўлга киритди. Унинг ҳисобида олтита Премьер-лига чемпионлиги мавжуд бўлиб, бу борада у Кевин Де Бруйне ва Жон Стоунз билан бир хил натижа қайд этган. Португалиялик юлдуз жорий мавсум якунида жамоани тарк этиши кутилаётган бўлса-да, унинг номи клуб тарихига олтин ҳарфлар билан ёзилди.
“Zamin”ни Telegram'да ўқинг! 
