Англия футбол ассоциацияси «Манчестер Юнайтед» ҳимоячиси Лисандро Мартинесга нисбатан чиқарилган қизил карточка бўйича апелляцияни рад этди. Аргентиналик футболчи «Лидс» ҳужумчиси Доминик Калверт-Люиннинг сочидан тортгани учун майдондан четлатилган эди. Эндиликда у учта ўйинни ўтказиб юбориши расман тасдиқланди. Бу ҳақда Goal.com хабар беради.
Тартиб-интизом панели ҳакамнинг қарорини тўғри деб топди ва бундай хатти-ҳаракатлар профессионал футболда мутлақо қабул қилинмаслигини таъкидлади. Мартинес «Челси»га қарши баҳсни ўтказиб юборган бўлса, энди «Брентфорд» ва «Ливерпуль» билан бўладиган муҳим учрашувларда ҳам жамоасига ёрдам бера олмайди.
Жамоа бош мураббийи вазифасини бажарувчи Майкл Каррик ушбу қарордан норози эканини яширмади. У ҳакамнинг қарорини ўзи кўрган энг ёмон қарорлардан бири деб атаган бўлса-да, якуний хулосага бўйсунишга мажбур эканини билдирди. Каррикнинг сўзларига кўра, жамоа бу вазиятни қабул қилиб, олдинга интилиши лозим.
Ҳимоя чизиғидаги инқироз янада кучайди, чунки Маттейс де Лигт ва Ленй Йоро ҳам жароҳат сабабли сафдан чиққан. Фақатгина дисквалификацияси якунланган Гарри Магуайр таркибга қайтиши кутилмоқда. Мартинес фақат 9 май куни «Сандерленд»га қарши ўйинда майдонга тушиши мумкин бўлади.
“Zamin”ни Telegram'да ўқинг! 
