"Манчестер Юнайтед" собиқ ярим ҳимоячиси Никки Батт "Манчестер Сити" юлдузи Бернардо Силванинг "Олд Траффорд"га кўчиб ўтиши ҳақидаги миш-мишларга муносабат билдирди. Унинг фикрича, португалиялик футболчи Карлос Тевес каби шов-шувли трансферни амалга оширмайди. Силва жорий шартномаси якунига етаётган бўлса-да, шаҳарнинг кўк қисмига бўлган садоқати туфайли рақиб лагерига ўтишни истамайди. Бу ҳақда Goal.com хабар беради.
Батт Силвани дунёнинг исталган жамоаси учун мукаммал ўйинчи деб атади, бироқ унинг "Манчестер Юнайтед" тизимига мос келмаслигини таъкидлади. Собиқ футболчининг сўзларига кўра, таркибда Бруно Фернандес борлиги сабабли икки ижодкор ярим ҳимоячини бир вақтда майдонга тушириш қийин бўлади. Шунингдек, Силва Пеп Гвардиола қўл остида барча совринларни қўлга киритган ва ўз обрўсини хавф остига қўйишни хоҳламайди.
Шу билан бирга, Батт ўз вақтида "Манчестер Юнайтед" ҳимоячи Жон Стоунзни қўлдан чиқарганини эслаб ўтди. У клубда ишлаган йиллари Стоунз билан музокаралар олиб борилган, бироқ якунда футболчи "Манчестер Сити"ни танлаган эди. Батт Стоунзни афсонавий Рио Фердинандга қиёслаб, унинг майдон марказига ўтиб ўйнаш қобилиятини юқори баҳолади.
Ҳозирда 31 ёшли Бернардо Силвага Испаниянинг гранд клублари қизиқиш билдирмоқда. Эркин агентга айланиши кутилаётган футболчи учун "Барселона" ва "Реал Мадрид" асосий даъвогарлар бўлиб турибди. "Манчестер Юнайтед" эса бор эътиборини Фернандес билан бирга ўйнай оладиган бошқа ярим ҳимоячиларни қидиришга қаратган.
“Zamin”ни Telegram'да ўқинг! 
