Англия Премьер-лигасининг навбатдаги турида "Арсенал" ўз майдонида "Нюкасл" жамоасини қабул қилади. Учрашув 25 апрель куни Тошкент вақти билан соат 22:30 да старт олиши белгиланган. Сўнгги ҳафталарда Микел Артета шогирдлари ўз уйида "Борнмут" ва сафарда "Ман Сити" жамоаларига 1:2 ҳисобида имкониятни бой бериб, чемпионлик пойгасида қийин аҳволга тушиб қолди. Бу ҳақда Goal.com хабар беради.
"Арсенал" таркибида жиддий йўқотишлар мавжуд. Букайо Сака Ахилл пайидаги жароҳати сабабли майдонга туша олмайди. Шунингдек, Юрриен Тимбер, Риккардо Калафиори ва Мартин Одегаарднинг иштироки ҳам сўроқ остида турибди. Лондонликлар сўнгги бешта ўйинда бор-йўғи учта гол уришга муваффақ бўлди, бу эса жамоанинг ҳужум чизиғида муаммолар борлигидан далолат беради.
Меҳмонлар сафида ҳам кадрлар масаласи мураккаб кечмоқда. Жоэлинтон дисквалификация туфайли ўйинни ўтказиб юборади, Энтони Гордон ва Тино Ливраменто эса жароҳатидан тикланиш жараёнини ўтамоқда. Турнир жадвалида 14-ўринни эгаллаб турган Эдди Хау жамоаси учун бу баҳс мавсумнинг қолган қисмида ўз нуфузини тиклаш учун яхши имкониятдир.
Статистик маълумотларга кўра, ҳар икки жамоа ҳам ўз мақсадлари йўлида муросасиз кураш олиб боради. "Арсенал" пешқадамликни сақлаб қолишга уринса, "Нюкасл" аутсайдерлар қаторидан узоқлашишни кўзламоқда. Мухлислар ушбу қизиқарли қарама-қаршиликни турли платформалар ва телеканаллар орқали жонли эфирда кузатиб боришлари мумкин.
“Zamin”ни Telegram'да ўқинг! 
