"Арсенал" бош мураббийи Микел Артета Англия Премьер-лигасининг навбатдаги турида "Ман Сити"га қарши бўлиб ўтадиган баҳс олдидан ўз фикрлари билан ўртоқлашди. Мутахассис Лондон клуби сафарда дуранг учун ўйнаши ҳақидаги тахминларни рад этиб, жамоасининг мақсади фақат уч очко эканини таъкидлади. Бу ҳақда Goal.com хабар беради.
Ушбу муҳим учрашувда "Арсенал" ўзининг етакчи футболчиси Букайо Сакасиз майдонга тушади. Мураббийнинг сўзларига кўра, вингер Ахилл пайидаги жароҳати сабабли сафдан чиққан ва ўйинда иштирок этиши аниқ эмас.
Шунингдек, Мартин Одегаард ва Журриен Тимбернинг ҳолати ўйин олдидан текширилади.
«Биз ғалаба қозонишни истаймиз ва бунга тайёргарлик кўряпмиз. Дуранг ҳақида ҳеч қандай гап бўлиши мумкин эмас.
Сўнгги беш йил ичида қайси стадионга борган бўлсак, ўша ёндашувни сақлаб қоламиз», — деди Артета матбуот анжуманида.
Ҳозирда лондонликлар турнир жадвалида рақибидан олти очко олдинда бормоқда, бироқ Пеп Гвардиола жамоасида битта захира ўйини мавжуд. Артета икки йил аввалги танқидларга сабаб бўлган ҳимоявий ўйинни такрорламасликка ва 22 йиллик танаффусдан сўнг чемпионликни қўлга киритишга ваъда берди.
Клуб ички чемпионатдаги курашдан ташқари, Европа Чемпионлар лигаси ярим финалида "Атлетико"га қарши баҳсга ҳам тайёргарлик кўрмоқда. Артета жароҳатларга қарамай, жамоанинг руҳий ҳолати кучли эканини ва ҳар қандай вазиятда ечим топишга тайёрлигини билдирди.
“Zamin”ни Telegram'да ўқинг!
