«Челси» раҳбарияти Лиам Росениор истеъфога чиқарилганидан сўнг янги бош мураббий излаш жараёнини бошлади. Ҳозирда асосий номзодлар сифатида «Борнмут» устози Андони Ираола ва «Комо» клубини бошқараётган Сеск Фабрегас кўрилмоқда. Клуб эгалари ўзларининг тўрт йиллик бошқаруви давомидаги бешинчи доимий мураббийни тайинлаш арафасида турибди. Бу ҳақда Goal.com хабар беради.
Ираола «Борнмут» билан Премьер-лигада катта тажриба тўплади ва ёш футболчилар билан ишлаш қобилиятини намойиш этди. Унинг жамоаси жорий мавсумда ҳужумкор ўйин кўрсатиб, ҳатто кучли бешликка киришга муваффақ бўлди. Мутахассиснинг шартномаси мавсум охирида якунланиши «Челси» учун молиявий жиҳатдан қулай вариант ҳисобланади, чунки лондонликлар товон пули тўлашдан қутулиб қолишади.
Сеск Фабрегас эса Италиянинг «Комо» клубида кутилмаган натижалар қайд этмоқда. У жамоани А Сериянинг юқори поғоналарига олиб чиқди ва жозибадор футбол услубини жорий қилди. Фабрегаснинг «Челси» билан ўтмишдаги алоқалари ва унинг жаҳон футболидаги нуфузи футболчилар орасида катта ҳурмат қозонишига хизмат қилиши мумкин. Сеск турли услубдаги буюк мураббийлар қўлида тўп сургани унинг мураббийлик фалсафасига ижобий таъсир кўрсатган.
Клуб молиявий қийинчиликларни бошдан кечираётган бир пайтда, янги мураббий тайинлаш масаласи стратегик аҳамиятга эга. «Челси» ўтган мавсумда рекорд даражадаги 262 миллион фунт зарар кўрганини эълон қилган эди. Шу сабабли, раҳбарият ҳам иқтисодий, ҳам спорт натижалари нуқтаи назаридан энг тўғри қарорни қабул қилиши лозим.
“Zamin”ни Telegram'да ўқинг! 
