"Саутгемптон" жамоаси Англия кубоги ярим финали доирасида "Ман Сити"га қарши кечадиган учрашувда ўзининг анъанавий қизил-оқ рангли либосларидан воз кечди. Жамоа "Уэмбли" стадионидаги баҳсда махсус сариқ рангли формада ҳаракат қилади. Ушбу либос клуб тарихидаги ягона йирик соврин — 1976 йилги Англия кубоги финалида "Манчестер Юнайтед" устидан қозонилган ғалабанинг 50 йиллиги муносабати билан тайёрланган. Бу ҳақда Goal.com хабар беради.
Клубнинг 141 йиллик тарихидаги энг ёрқин лаҳзани ёдга солувчи ушбу либосда футболчиларнинг фамилиялари ёзилмаган. Жамоа бош мураббийи Тонда Эккерт ушбу "омадли" либос ўз шогирдларини янги мўжизаларга чорлашига умид қилмоқда. Немис мутахассиси бошқарувидаги "авлиёлар" жорий мавсум кубок баҳсларида ушбу сариқ формадан доимий фойдаланиб келмоқда ва йўлда "Арсенал" ҳамда "Фулхэм" каби кучли рақибларни мағлуб этишга улгурди.
Эккертнинг таъкидлашича, Премьер-лига пешқадамига қарши ўйинда жамоа жасорат кўрсатиши шарт. «Чемпионшипда ғалаба қозониш ишонч бағишлайди, аммо Премьер-лига жамоалари билан тенгма-тенг кураша олишингизни кўриш янада кўпроқ куч беради», — дея қўшимча қилди мураббий. Англия футбол ассоциацияси клубга ушбу тарихий либосдан ярим финалда фойдаланиш учун махсус рухсат берган.
"Уэмбли"даги учрашувга 36 мингга яқин "Саутгемптон" мухлислари ташриф буюриши кутилмоқда. Уларнинг кўпчилиги 1976 йилги ғолиб таркиб аъзоларининг имзолари туширилган чекланган миқдордаги эсдалик либосларини харид қилган. Агар Эккерт шогирдлари ғалаба қозонса, финалда "Челси" ёки "Лидс" жуфтлиги ғолиби билан бош соврин учун кураш олиб боради.
“Zamin”ни Telegram'да ўқинг! 
