Жереми Доку дунёнинг энг яхши вингери бўлиш шартини айтди
«Манчестер Сити» ҳужумчиси Жереми Доку дунёнинг энг кучли вингери бўлиш учун гол уриш самарадорлигини ошириши зарурлигини таъкидлади. Футболчи дриблинг борасида етакчи бўлса-да, юқори чўққига чиқиш учун сермаҳсуллик асосий омил эканини тан олди. Шунингдек, Доку ўзбекистонлик ҳимоячи Абдуқодир Ҳусановнинг тезлигига юқори баҳо бериб, узоқ масофага югуришда унга имкониятни бой бериши мумкинлигини қайд этди.
«Ман Сити» ҳужумчиси Жереми Доку дунёнинг энг кучли қанот вакиллари қаторига кириш ниятида эканини маълум қилди. Бельгия терма жамоаси аъзоси ўзининг дриблинг қобилияти билан танилган бўлса-да, юқори чўққига чиқиш учун самарадорликни ошириши кераклигини тушуниб турибди. Бу ҳақда Goal.com хабар беради.
Доку 2023 йилда 55 миллион фунт эвазига «Ренн» клубидан трансфер қилинганидан буён Премьер-лигада энг кўп алдаб ўтишларни амалга оширган футболчи бўлиб турибди. Бироқ унинг 123 ўйиндаги 19 та голи Пеп Гвардиолани тўлиқ қониқтирмаяпти.
Мураббий аввалроқ Докунинг тўпурар бўлишига шубҳа билдирган эди.
«Қанот ҳужумчиси гол уриши шарт. Агар мен кўпроқ гол киритсам, 100 фоиз энг кучлилар қаторига кираман.
Ҳимоячилардан сўраб кўринг, улар мен гол уришни бошласам, вазият бутунлай ўзгаришини тасдиқлашади», — дейди футболчи.
Доку рақиблар унга қарши алоҳида тактика қўллаётганини, кўпинча икки ҳимоячи уни қўриқлаётганини таъкидлади. Шунингдек, у жамоасидаги энг тезкор футболчи борасидаги баҳсларга ҳам тўхталиб ўтди.
Унинг фикрича, Абдукодир Ҳусанов қисқа масофада жуда тезкор ҳисобланади.
«Ҳусановнинг тезлиги ҳамма учун маълум. 15 метрлик масофада ўзимга ишонаман, лекин 40 метрлик югуришда Ҳусанов мени ютса керак», — дея тан олди Доку.
Ҳозирда «Ман Сити» ички требл қайд этиш учун курашни давом эттирмоқда.
Изоҳлар 0
…