"Бавария" Саид Эл Малани трансфер қилиш учун асосий даъвогарга айланди
Мюнхеннинг "Бавария" клуби "Кёльн" жамоасининг 19 ёшли иқтидори Саид Эл Малани қўлга киритиш учун асосий даъвогарга айланди. Аввалроқ футболчига қизиқиш билдирган "Брайтон" клуби немислар талаб қилган 50 миллион еврони тўлашдан бош тортгани сабабли трансфер пойгасини тарк этди. Ҳозирда Эл Мала учун "Челси" ва "Нюкасл" каби клублар ҳам курашмоқда, бироқ мюнхенликлар уни ўз таркибида кўришга жуда яқин турибди. Футболчининг нуфузли "CAA Stellar" агентлиги билан ҳамкорликни бошлаши ёзги трансфер ойнасида йирик битим амалга ошишидан далолат беради.
Германиянинг "Кёльн" клуби юлдузи Саид Эл Мала учун курашда кутилмаган бурилиш юз берди. Шу вақтга қадар асосий даъвогар бўлиб келган "Брайтон" трансфер пойгасини тарк этди. Бу ҳақда Goal.com хабар беради.
Бу ҳолат Мюнхеннинг "Бавария" клубига 19 ёшли иқтидор эгасини қўлга киритиш учун қулай имконият яратди.
Маълумотларга кўра, Англия клуби ва футболчининг оиласи ўртасида оғзаки келишувга эришилган эди. Бироқ "Брайтон" томонидан таклиф қилинган 35 миллион евро "Кёльн" раҳбариятини қониқтирмади.
Немис клуби ўз тарбияланувчиси учун камида 50 миллион евро талаб қилмоқда.
Ҳозирда Эл Малага "Челси" ва "Нюкасл" клублари ҳам жиддий қизиқиш билдирмоқда. "Бавария" эса футболчини Луис Диасга рақобатчи сифатида кўрмоқда.
Мюнхенликлар айни дамда Энтони Гордон вариантини ҳам кўриб чиқмоқда, бироқ унинг нархи 80 миллион евродан баландлиги трансферни қийинлаштириши мумкин.
Музокаралар муваффақиятсиз якунлангач, Эл Мала оиласи профессионал ёрдам олишга қарор қилди. Эндиликда футболчининг ишларини Фермин Лопес ва Эдуардо Камавинга каби юлдузлар билан ишлайдиган "CAA Стеллар" агентлиги юритади.
Бу қадам ёзги трансфер ойнасида йирик битим амалга ошишидан далолат беради.
Изоҳлар 0
…