"Боруссия Дортмунд" клубидан "Хайденхайм"га ижарага берилган дарвозабон Диант Рамаж Европанинг кучли бешлик чемпионатларида исталмаган натижа қайд этди. 24 ёшли посбон жорий мавсумда бирорта ўйинда ўз дарвозаси дахлсизлигини сақлаб қола олмаган ягона дарвозабонга айланди. Бу ҳақда Goal.com хабар беради.
Рамаж Германия Бундеслигасида Кевин Мюллер ўрнини эгаллаганидан сўнг асосий таркибдан жой олди. Бироқ унинг жамоаси 66 та гол ўтказиб юбориб, турнир жадвалининг энг қуйи поғонасида бормоқда.
Дарвозабоннинг ўзи эса дарвозасига йўлланган зарбаларнинг атиги 60 фоизини қайтара олган.
Шунга қарамай, Рамаж ўз қобилиятига юқори баҳо бермоқда. У берган интервьюсида ўзини ёш авлоднинг энг яхши дарвозабони деб ҳисоблашини ва Дортмундга қайтгач, Грегор Кобелнинг ўрнини эгаллаш ниятида эканини таъкидлади.
Унинг сўзларига кўра, у захирада ўтириш учун қайтмайди.
"Хайденхайм" бош мураббийи Франк Шмидт жамоанинг қуйи лигага тушиб кетиш эҳтимоли юқорилиги сабабли таркибда ўзгаришлар қилишни режалаштирмоқда. Мураббий қолган учрашувларда асосий дарвозабон ўрнига Франк Феллерни синаб кўриши мумкинлигини маълум қилди.
Рамажнинг "Боруссия Дортмунд" билан шартномаси давом этаётган бўлса-да, унинг келажаги ноаниқлигича қолмоқда. Дортмундликлар сафида Кобел ва Меер билан рақобат кучли бўлгани сабабли, футболчи яна бошқа клубга ижарага берилиши мумкин.
“Zamin”ни Telegram'да ўқинг!
