"Рома" бош мураббийи Жан Пьеро Гасперини "Аталанта"га қарши А Серия ўйини олдидан ўтказилган матбуот анжуманида ҳиссиётларини жиловлай олмади. Мутахассис клуб маслаҳатчиси Клаудио Раниери билан юзага келган очиқ низо сабабли кўз ёш тўкди ва тадбирни муддатидан олдин якунлади. Бу ҳақда Goal.com хабар беради.
Можарога Раниерининг яқинда берган интервьюси сабаб бўлган. Унда фахрий мураббий Гасперини ўтган ёзда клуб учун фақат тўртинчи танлов бўлганини ва барча трансферлар айнан амалдаги мураббий розилиги билан амалга оширилганини таъкидлаган эди.
Гасперини бу гапларни кутилмаган зарба деб атади.
«Раниери билан орамизда ҳеч қачон бундай оҳангда гап бўлмаган эди. Мен буни кутмагандим ва фаолиятим давомида бундай муносабатга дуч келмаганман.
Клуб, жамоа ва мухлисларга зарар етказмаслик учун бу борада бошқа изоҳ бермайман», — деди Гасперини.
Ички низолар фақат Раниери билан чекланиб қолмаган. Мураббий клуб тиббий штаби билан ҳам футболчиларнинг жисмоний ҳолати борасида келишмовчиликлар борлигини тасдиқлади.
Хусусан, Уеслининг жароҳати ва унинг майдонга тушиш имконияти борасида раҳбарият ва шифокорлар ўртасида баҳслар давом этмоқда.
Гасперини ўзининг собиқ жамоаси "Аталанта"даги фаолиятини эслаганда янада таъсирланди. У Бергамодаги аҳиллик ва клуб президенти Антонио Перкасси билан бўлган яқин муносабатларини ёдга олиб, Римдаги ҳозирги вазиятдан қаттиқ тушкунликка тушганини намойиш этди ва зални йиғлаб тарк этди.
“Zamin”ни Telegram'да ўқинг!
