Ўзбекистон футболи оғир йўқотишга дуч келди. Миллий жамоа собиқ аъзоси, мамлакатда хизмат кўрсатган спортчи ва мураббий, ҳақиқий футбол фахрийси Абдусамад Дўрмонов 60 ёшида ҳаётдан кўз юмди.
Абдусамад Дўрмонов 1965 йилда Термиз шаҳрида таваллуд топган. У футболчилик фаолияти давомида юртимизнинг етакчи клубларида ўйнаб, мухлислар меҳрини қозонган. Жумладан, у «Пахтакор» (1987–1989), «Сурхон» (1990–1991) ҳамда узоқ йиллар давомида «Нефтчи» (1992–2002) жамоаси шарафини муносиб ҳимоя қилган.
Айниқса, Фарғонанинг «Нефтчи» клуби билан бирга қўлга киритган ютуқлари унинг фаолиятида алоҳида ўрин тутади. У жамоа билан беш маротаба Ўзбекистон чемпионлигини қўлга киритиб, клуб тарихида ўз номини олтин ҳарфлар билан ёзиб қолдирган.
Шунингдек, Дўрмонов 1992–1994 йиллар оралиғида Ўзбекистон миллий жамоасига жалб этилган. У 1994 йил Японияда бўлиб ўтган Осиё ўйинларида қатнашиб, тарихий ғалабага ҳисса қўшган футболчилардан бири бўлган.
У нафақат майдонда, балки ҳаётда ҳам футбол билан чамбарчас боғланган инсон эди. Унинг оиласи ҳам спортга яқин бўлиб, укаси Рустам Дўрмонов билан бирга «Нефтчи»да тўп сурган, яна бир укаси Равшан Дўрмонов эса «Сурхон» клубида фаолият юритган.
2002 йилда футболчилик фаолиятини якунлаганидан сўнг, у мураббийликка ўтиб, ўз тажрибасини ёш авлодга улашишга бел боғлади. У «Нефтчи», «Ёзёвон лочинлари» ва «Истиқлол» каби жамоаларда мураббий сифатида ишлаб, сўнгги йилларгача «Нефтчи» клуби мураббийлар штабида фаолият юритиб келаётганди.
Абдусамад Дўрмонов нафақат натижалари, балки инсон сифатидаги самимийлиги, меҳнатсеварлиги ва футболга бўлган садоқати билан ҳам ёдда қолади. Унинг номи ўзбек футболи тарихида абадий сақланиб қолади.
