42 ёшли бразилиялик собиқ ҳимоячи Данте "Бавария" клубига мураббий сифатида қайтмоқда. У Мюнхен жамоасининг тўртинчи дивизионда иштирок этувчи захира жамоасини бошқаради. Бу ҳақда Goal.com хабар беради.
Данте ёзда соғлиғи билан боғлиқ муаммолар туфайли Франциянинг "Нисса" клуби сардорлигидан кетган эди. Эндиликда у ўзининг бой тажрибаси билан "Бавария" ёшлар тизимини ривожлантиришга ёрдам беради.
Собиқ футболчи мураббийлик фаолиятига узоқ вақт тайёргарлик кўрган. У ўтган йили УЕФА Pro лицензиясини қўлга киритди ва "Нисса" ёшлар жамоаларида машғулотлар ўтказиб келаётган эди.
Данте 2013 йилда "Бавария" билан требл қайд этган ва мухлислар ёқимтойига айланган. Унинг собиқ устози Пеп Гвардиола бир вақтлар ўз жамоасида мингта Данте бўлишини хоҳлашини айтиб ўтган.
"Бавария" спорт директори Кристоф Фройнд захира жамоасида клубнинг собиқ футболчиларини мураббий сифатида тайёрлаш тизимини жорий қилмоқда. Данте бу лойиҳанинг муҳим қисмига айланади.
“Zamin”ни Telegram'да ўқинг!
