Европа футболида яна бир тарихий воқеа рўй бериш арафасида. Чемпионлар Лигаси ва собиқ Европа Чемпионлар Кубоги мусобақаси тарихида илк бор ҳал қилувчи финалда икки испаниялик мураббий бошқараётган жамоалар ўзаро тўқнаш келади.
Журналист Педро Мартин маълумотига кўра, бу сафарги финалда Луис Энрике бошчилигидаги Франциянинг “Пари Сен-Жермен” клуби ҳамда Микел Артета қўл остидаги Англиянинг “Арсенал” жамоаси майдонга тушади. Бу эса нафақат клублар, балки испан мураббийлик мактаби учун ҳам катта воқеа сифатида баҳоланмоқда.
Луис Энрике сўнгги йилларда “ПСЖ”да янги ва жанговор жамоа қуришга эришди. Парижликлар бу мавсум Европа аренасида жуда ишончли ҳаракат қилди ва яримфиналда Германиянинг “Бавария” клубини мусобақадан чиқариб юборди.
Микел Артета эса “Арсенал”ни яна Европанинг энг кучли клублари қаторига қайтарди. Лондонликлар сўнгги бир неча йилда катта ўсишга эришиб, ниҳоят Чемпионлар Лигаси финалигача етиб келишди.
Қизиқ жиҳати шундаки, бугунгача Чемпионлар Лигаси ва Европа Чемпионлар Кубоги финалларида бир мамлакат вакиллари бўлган мураббийлар ўртасидаги қарама-қаршилик атиги тўрт марта кузатилган.
1979 йилда англиялик Брайан Клаф бошқарган “Ноттингем Форест” ва Боб Ҳафтон бошчилигидаги “Малмё” финалда учрашган. 2003 йилда италиялик мутахассислар Марчелло Липпи ва Карло Анчелотти бошқарувидаги “Ювентус” ҳамда “Милан” ўзаро баҳс олиб борган.
2013 йилда немис мураббийлари Юрген Клопп ва Юпп Хайнкес бошчилигидаги “Боруссия Дортмунд” ҳамда “Бавария” финалда майдонга тушган бўлса, 2020 йилда немис футболи вакиллари Томас Тухел ҳамда Ҳанс-Дитер Флик бошқарган “ПСЖ” ва “Бавария” ҳал қилувчи баҳсда иштирок этган.
Энди эса тарихда биринчи марта икки испаниялик мураббий Чемпионлар Лигаси бош соврини учун ўзаро кураш олиб боради.
Эслатиб ўтамиз, “ПСЖ” — “Арсенал” финал баҳси 30 май куни Венгрия пойтахти Будапешт шаҳридаги машҳур “Пушкаш Арена” стадионида бўлиб ўтади. Футбол мухлисларини тактик жиҳатдан жуда қизиқарли ва муросасиз беллашув кутаётгани шубҳасиз.
“Zamin”ни Telegram'да ўқинг!
