Европа Чемпионлар Лигасида яримфиналнинг жавоб учрашувлари якунланганидан кейин ҳафтанинг энг яхши футболчиларидан иборат рамзий жамоа эълон қилинди. Қизиғи шундаки, бу сафар рамзий таркибда асосий устунликни Лондоннинг “Арсенал” ҳамда Парижнинг “ПСЖ” клублари футболчилари эгаллади.
Ҳар икки жамоадан тўрт нафардан ўйинчи ҳафтанинг энг кучли таркибига киритилди. Бу эса уларнинг ҳал қилувчи баҳсларда қай даражада юқори савияда ўйин намойиш этганини яна бир бор тасдиқлаб турибди.
Дарвозабон позициясида “Арсенал” посбони Давид Райя танланди. Испаниялик кипер яримфиналда жамоасини бир неча хавфли вазиятларда қутқариб қолиб, ишончли ҳаракатлари билан мухлислар ва мутахассислар эътирофига сазовор бўлди.
Ҳимоя чизиғида эса “ПСЖ” вакили Вилям Пачо, “Атлетико” футболчиси Пубил ҳамда “Арсенал” ҳимоячиси Вилям Салиба жой олди. Айниқса, Салибанинг совуққон ва ишончли ўйини яна бир бор юқори баҳоланди.
Ярим ҳимояда тажриба ва техника уйғунлашган таркиб шаклланди. “Бавария” лидери Йозуа Киммих, “ПСЖ”нинг ёш истеъдоди Дезире Дуэ, “Арсенал” таянч футболчиси Деклан Рейс ҳамда грузиялик маҳорат соҳиби Хвича Кварацхелия рамзий жамоадан ўрин олди.
Хусусан, Кварацхелиянинг “Бавария”га қарши баҳсдаги фаоллиги ва ҳал қилувчи вазиятлардаги ҳаракатлари Европа матбуотида катта муҳокама қилинмоқда.
Ҳужум чизиғига эса “Арсенал” вингери Букайо Сака, “ПСЖ”нинг тезкор форварди Усмон Дембеле ва “Бавария” ҳужумчиси Луис Диас киритилди.
Мутахассислар фикрича, бу ҳафтаги рамзий жамоа Чемпионлар Лигасидаги энг қизиқ ва драматик баҳсларда ҳал қилувчи рол ўйнаган футболчилардан тузилган.
Айниқса, “Арсенал” ва “ПСЖ” футболчиларининг кўпчиликни ташкил қилиши финалга чиққан икки жамоа ҳозир Европанинг энг кучли клублари қаторида эканини кўрсатмоқда.
“Zamin”ни Telegram'да ўқинг!
