Бавария Чемпионлар лигаси ярим финалида PSJга қарши кечган драматик баҳсда мағлубиятга учраган бўлса-да, Харри Кейн ўз келажагини Мюнхен клуби билан боғламоқда. Англия терма жамоаси сардорининг мусобақадан чиқиб кетиши кўплаб муҳокамаларга сабаб бўлди, бироқ экспертлар унинг Англия Премер-лигасига қайтиш эҳтимолини кескин рад этишмоқда. Бу ҳақда Goal.com хабар беради.
Астон Вилла собиқ ҳужумчиси Габриел Агбонлаҳор талкСПОРТ эфирида Кейннинг Германияда ўзини бахтли ҳис қилаётганини таъкидлади. Унинг фикрича, футболчи ҳозирги босқичда Англияга қайтишдан кўра, Баварияда қолишни ёки келажакда Саудия Арабистони ёхуд АҚШ чемпионатларига йўл олишни афзал кўради.
Жорий мавсумда 55 та гол урган Харри Кейн учун Чемпионлар лигасидан чиқиб кетиш Баллон дъОр соврини учун курашда жиддий зарба бўлди. Агбонлаҳорнинг таъкидлашича, гарчи Кейн шахсий совринлар ҳақида ўйласа-да, у биринчи навбатда жамоавий муваффақиятни кўзлайди.
Германиялик футбол эксперти Рафаел Хонигштайн ҳам Кейннинг Бавариядаги келажаги борасида хотиржам. Унинг сўзларига кўра, футболчи Мюнхен клуби билан узоқ муддатли ҳамкорликка тайёр ва унинг асосий мақсади — келаси ёзда Англия терма жамоаси билан йирик турнирларда ғалаба қозониш орқали ўзини кўрсатишдир.
“Zamin”ни Telegram'да ўқинг!
