Италиянинг Милан клуби Реал Мадрид ҳимоячиси Давид Алаба билан шартнома имзолаш имкониятларини кўриб чиқмоқда. Клуб раҳбарияти таниқли агент Пини Заҳави билан музокаралар ўтказиб, австриялик футболчини эркин агент сифатида таркибга қўшиб олиш вариантини муҳокама қилди. Бу ҳақда Goal.com хабар беради.
Дастлабки музокаралар Роберт Левандовски атрофида кечган бўлса-да, ҳужумчининг юқори маош талаблари Милан учун молиявий тўсиқ бўлди. Шундан сўнг, эътибор Заҳавининг яна бир мижози бўлган 33 ёшли Давид Алабага қаратилди. Тажрибали ҳимоячининг Мадрид клуби билан амалдаги шартномаси якунланиб бораётгани италянлар учун қулай имконият сифатида баҳоланмоқда.
Милан мураббийлар штаби Алабанинг кўп функцияли ўйинчи эканлигини юқори баҳоламоқда. У марказий ҳимоячи, қанот ҳимоячиси ёки таянч ярим ҳимоячи позицияларида бирдек ҳаракат қила олади. Бу эса жамоа ҳимоя чизиғини сезиларли даражада кучайтириши мумкин.
Шунга қарамай, футболчининг сўнгги йиллардаги жароҳатлари клуб раҳбариятини хавотирга солмоқда. Алабанинг жисмоний ҳолати ва узоқ муддат сафдан чиқиши А Серия каби талабчан чемпионатда барқарор ўйин кўрсатишига тўсқинлик қилиши мумкинлиги айтилмоқда.
“Zamin”ни Telegram'да ўқинг!
