Реал Мадрид машғулотлар базасида юз берган жиддий тўқнашувдан сўнг Федерико Вальверде ва Аурелиен Тчоуамени устидан интизомий иш очди. Машғулот вақтида келиб чиққан жанжал оқибатида уругвайлик ярим ҳимоячи бош қисмидан жароҳат олиб, шифохонага ётқизилди. Бу ҳақда Goal.com хабар беради.
Клуб расмий баёнотига кўра, Вальверде 14 кунгача бўлган даволаниш муддатини ўтказади. Реал Мадрид раҳбарияти ушбу ҳолатни жамоа ички тартиб-қоидаларининг қўпол равишда бузилиши деб баҳоламоқда ва ҳар икки футболчини бир ойгача бўлган муддатга ишдан ҳамда маошдан четлатиш масаласини кўриб чиқмоқда.
Мундо Депортиво хабарига кўра, футболчилар 10 кундан 30 кунгача бўлган муддатга дисквалификация қилиниши ва жаримага тортилиши мумкин. Клуб ушбу вазиятни ўта жиддий деб ҳисобламоқда ва махсус терговчи тайинлаб, гувоҳлар кўрсатмалари асосида расмий айблов хулосасини тайёрламоқда.
Ушбу воқеа Реал Мадрид учун жуда ноқулай паллага тўғри келди. Жамоа яқинлашиб келаётган Барселона билан Эл-Класико баҳсига Вальверде хизматларисиз тайёргарлик кўрмоқда. Тчоуаменининг ҳам четлатилиши эҳтимоли жамоа ярим ҳимоясида катта бўшлиқни юзага келтириши мумкин.
“Zamin”ни Telegram'да ўқинг!
