2027 йил Саудия Арабистонида бўлиб ўтадиган Осиё кубоги учун қуръа ташлаш маросими Ар-Риёд шаҳрида ўтказилди. Қитъанинг энг нуфузли футбол мусобақаси олдидан барча терма жамоалар ўз рақибларини билиб олди.
Қуръа натижаларига кўра, Ўзбекистон миллий терма жамоаси B гуруҳидан жой олди. “Оқ бўрилар” гуруҳ босқичида Баҳрайн, Шимолий Корея ва Иордания терма жамоаларига қарши майдонга тушади.
Бу гуруҳ бир қарашда мувозанатли кўринса-да, унда осон рақиб йўқ. Баҳрайн ҳар доим жисмонан тайёр ва тартибли ўйини билан ажралиб туради. Шимолий Корея терма жамоаси кутилмаган услуби ва қаттиқ интизоми билан хавфли рақиб ҳисобланади. Иордания эса сўнгги йилларда Осиё футболида анча ўсган, характерли ва тезкор жамоалардан бирига айланган.
Ўзбекистон учун бу қуръа жиддий синов, шу билан бирга яхши имконият ҳамдир. Терма жамоамиз 1-саватчадан жой олгани бежиз эмас. Сўнгги йилларда миллий жамоа таркиби кучайиб, халқаро майдонда барқарор натижалар кўрсатмоқда. Энди бу мавқени Осиё кубогида майдонда исботлаш керак бўлади.
Турнир 2027 йилнинг 7 январидан 5 февралига қадар бўлиб ўтади. Мусобақада жами 24 та терма жамоа иштирок этади. Улар 6 та гуруҳга бўлинган ҳолда қитъа чемпионлиги учун кураш олиб боради.
Ўзбекистон терма жамоаси учун асосий вазифа — гуруҳ босқичидан ишончли ўтиш ва кейинги босқичларда янада дадил ҳаракат қилиш. Мухлислар бу сафар жамоадан фақат иштирок эмас, балки катта натижа кутаётгани сир эмас. Терма жамоада тажриба ҳам бор, ёшлик шижоати ҳам бор, энди фақат ҳаммасини бир тизимга солиш керак.
Осиё кубоги 2027 гуруҳлари:
А гуруҳи
Саудия Арабистони
Қувайт
Уммон
Фаластин
B гуруҳи
Ўзбекистон
Баҳрайн
Шимолий Корея
Иордания
C гуруҳи
Эрон
Сурия
Қирғизистон Республикаси
Хитой
D гуруҳи
Австралия
Тожикистон
Ироқ
Сингапур
E гуруҳи
Жанубий Корея
БАА
Вьетнам
Ливан/Яман
F гуруҳи
Япония
Қатар
Таиланд
Индонезия
Қуръа ташланди, рақиблар маълум бўлди. Энди навбат тайёргарликка, тўғри режага ва майдондаги характерга келди. Ўзбекистон учун бу турнир катта имконият: “оқ бўрилар” Осиё майдонида ўз сўзини айтишга тайёр бўлиши керак.
“Zamin”ни Telegram'да ўқинг!
