Манчестер Юнайтед бош мураббийи Майкл Каррикк жамоасининг Сандерленд билан кечган голсиз дурангидан сўнг, футболчиларни мавсум якунига етмай туриб мотивацияни йўқотганликда айблаган танқидчиларга кескин жавоб қайтарди. Мутахассис жамоанинг Чемпионлар лигаси йўлланмасини қўлга киритганидан сўнг бўшашиб қолгани ҳақидаги гапларни рад этди. Бу ҳақда Goal.com хабар беради.
Сандерлендга қарши баҳсда Манчестер Юнайтед ўз даражасидан пастроқ ўйин кўрсатди ва дарвозабон Сенне Ламменснинг ишончли ҳаракатлари эвазига бир очкони сақлаб қолди. Шунга қарамай, Каррикк шогирдларининг профессионализмига шубҳа билан қарашни қабул қилиб бўлмас ҳолат деб атади.
Матбуот анжуманида сўзга чиққан Каррикк: "Бундай айбловлар мени хафа қилади. Агар футболчиларимизда мотивация бўлмаганида, бугун мағлубиятга учраган бўлардик. Сандерленд жуда яхши ўйин намойиш этди ва бизни қийин аҳволга солиб қўйди", — дея таъкидлади.
Мураббийнинг фикрича, Манчестер Юнайтед каби буюк клуб шарафини ҳимоя қилишнинг ўзи футболчилар учун энг катта мотивация ҳисобланади. У мавсумнинг қолган қисмида ҳам жамоа ўз олдига қўйган вазифаларни бажаришда давом этишига ва рақобатбардош бўлишига ишонч билдирди.
“Zamin”ни Telegram'да ўқинг!
