Микел Артета Букайо Саканинг ўзига хос "аура"га эга бўлганини ва бу фазилат Арсеналнинг Англия Премер-лигаси ҳамда Чемпионлар лигасидаги тарихий ғалабалари учун муҳим аҳамият касб этишини таъкидлади. Мураббий ўз тарбияланувчисини рақиб ҳимоячиларида қўрқув уйғотадиган ва ўйин тақдирини бир лаҳзада ўзгартира оладиган ҳақиқий етакчи сифатида баҳолади. Бу ҳақда Goal.com хабар беради.
Жорий мавсум давомида турли жароҳатлар билан курашганига қарамай, 24 ёшли вингер мавсумнинг ҳал қилувчи палласида ажойиб спорт формасига кирди. Сака яқинда Атлетико Мадрид дарвозасига ғалаба тўпини киритиб, Арсенални 20 йилдан сўнг Чемпионлар лигаси финалига олиб чиқишда катта ҳисса қўшди.
Артета футболчисининг жамоага таъсири ҳақида шундай деди: "Унинг клубдаги, жамоадаги ва майдондаги роли сезиларли даражада ўсди. У ҳозир ўзига хос мавқега ва ажойиб аурага эга. У ўйинни исталган вақтда ўзгартира оладиган ва рақибда ҳақиқий хавотир уйғотадиган даражадаги футболчидир".
Мураббий Саканинг жароҳатлар туфайли ўтказиб юборган вақтини ижобий баҳолаб, бу ҳолат футболчининг мавсум сўнггига янги куч ва мотивация билан кириб келишига ёрдам берганини қўшимча қилди. Артета ўз шогирдига айнан шу руҳий ҳолат жамоага катта ёрдам беришини уқтирган.
“Zamin”ни Telegram'да ўқинг!
