Вест Хем сардори Джаррод Боуэн Арсеналга қарши ўйинда ВАР томонидан бекор қилинган гол сабаб ҳакамлар ишини кескин танқид қилди. Лондон стадионида кечган баҳснинг сўнгги дақиқаларида мезбонлар ҳисобни тенглаштиргандек туюлган эди, бироқ беш дақиқалик текширувдан сўнг бош ҳакам Крис Кавана голни бекор қилди. Бу ҳақда Goal.com хабар беради.
Вазият жарима майдончасидаги тўполондан сўнг юзага келди ва тўп дарвоза тўрига киритилди. Бироқ, ВАР тизими ҳужум бошланишида қоида бузилиши борлигини аниқлади. Расмий баёнотга кўра, Вест Хем футболчиси дарвозабонга нисбатан қўполлик ишлатгани учун гол бекор қилиниб, Арсенал фойдасига жарима зарбаси белгиланди.
Ўйиндан сўнг Джаррод Боуэн ҳакамларга ўз эътирозини билдирди ва матбуотга берган интервюсида Англия Премер-лигасидаги қарорлар бир хил эмаслигидан норозилигини яширмади. Унинг сўзларига кўра, бундай узоқ давом этган текширувлар футболнинг завқини қочирмоқда ва вазиятни ҳар томонлама таҳлил қилса, ҳар доим ҳам қоида бузилишини топиш мумкин.
"Биз ўйинни қутқариб қолганимизга ишонгандик, аммо бу имконият биздан тортиб олинди. Премер-лига – бу жисмоний курашларга бой чемпионат. Агар ҳар бир кичик контакт учун гол бекор қилинаверса, бу футболнинг руҳига зид. Ўтган ҳафта Томас Соусек билан боғлиқ вазиятда бизга пеналти берилмаган эди, бугун эса бундай қарор қабул қилинди. Барқарорлик қани?" – деди футболчи.
Ушбу ғалаба эвазига Арсенал турнир жадвалида Манчестер Сити билан бўлган фарқни беш очкога етказиб олди. Вест Хем эса мағлубиятдан сўнг турнир жадвалининг қуйи қисмида қийин аҳволда қолди.
“Zamin”ни Telegram'да ўқинг!
