Барселона бош мураббийи Ханси Флик клуб билан янги шартнома борасида тўлиқ келишувга эришди. Германиялик мутахассис жамоани кетма-кет иккинчи марта Ла Лига чемпионлигига етаклаганидан сўнг, ўз келажагини каталонияликлар билан боғлашга қарор қилди. Бу қарор якшанба куни Реал Мадрид устидан қозонилган 2:0 ҳисобидаги ғалабадан сўнг расмийлаштирилди. Бу ҳақда Goal.com хабар беради.
Мундо Депортиво хабарига кўра, Флик ва клуб раҳбарияти ўртасидаги музокаралар унинг агенти Пини Заҳави иштирокида муваффақиятли якунланган. Янги келишувга кўра, мураббийнинг амалдаги шартномаси 2028-йилнинг июнига қадар узайтирилди. Шунингдек, шартномада натижаларга қараб уни 2029-йилгача узайтириш имконияти ҳам кўзда тутилган.
Клуб спорт директори Деко ва Пини Заҳави ўртасидаги учрашувлар жуда самарали ўтди. Барселона раҳбарияти апрель ойидан буён Фликни лойиҳанинг асосий қисми сифатида кўриб келаётган эди. Клуб президенти Жоан Лапорта ва унинг жамоаси немис мураббийининг клуб маданиятига тез мослашганидан мамнун.
Клуб вице-президенти Рафа Юсте мураббийнинг жамоада қолишидан жуда хурсанд эканлигини таъкидлади. Унинг сўзларига кўра, Флик Барселонада ўзини бахтли ҳис қилмоқда ва клубнинг келажакдаги ривожланишида муҳим ўрин тутади. Расмий эълон яқин кунларда клуб томонидан тақдим этилиши кутилмоқда.
“Zamin”ни Telegram'да ўқинг!
